Қазақстандағы оппозиция бас біріктіріп, билікке қарсы жүйелі күшке айналуы мүмкін. "Ұйқышыл" үкіметтің әрекетсіздігіне бұдан артық төзе алмаймыз деген саяси белсенділер бір жағадан бас, бір жеңнен қол шығарып әрекет етпек. Ал мұндай идеяны оппозицияда жүрген 19 азаматтың аты-жөнін атаған экс-депутат Нұржан Әлтаев ұсынып отыр. Үйлестіру кеңесін құрып, қоғамдағы өзекті мәселелерді шешеміз деген ол, тіпті, керек болса халықпен бірге митингіге де шығамыз дейді.
Білгенін жасайтын биліктен қорықпайпын деген экс-депутат Нұржан Әлтаев шетелдегі Қажыгелдиннен бастап, "Оян, Қазақстан!" деп жүрген Әсем Жәпішеваға дейінгі билікке наразы азаматтарды бірігуге шақырды. Сөйтіп, оппозицияның жүйелі қарсылықтарын бастамақ. Алайда биліктің кейбір қарсыластары Әлтаевтың бұл әрекетін пиар санайды.
АЗАМАТХАН ӘМІРТАЙ, "Экологиялық альянс" төрағасы:
– Оппозицияны біріктіру туралы идея келген кезде бірінші кеңесі керек, сол салада жүрген адамдармен кеңесіп барып шешім қабылдау керек. Ал егер олармен кеңеспей шешім қабылдаса, оның стратегиялықтан гөрі жарнамалық пиары көп деуге болады. Оппозиция баяғыда бірігіп қойды ғой. Егер сіз интернетті ғаламторды қарасаңыз, мүдде үшін бірігіп қойған бәрі.
Белсенділер биліктен топ етіп төмен түскендерден күдіктенентін сыңайлы. Сондықтан Әлтаевты бірі - қолдаса, ал енді бірі - оппозицияда тәжірибесі аз дейді.
РЫСБЕК СӘРСЕНБАЙҰЛЫ, қоғам белсендісі:
– Биліктің кезекті бір жобасы шығар. Мүмкін ол жігіт тұтқиылдан түс көріп, оң жақ аяғымен тұрып, осы оппозицияны мен біріктірмесем кім біріктіреді деп ойлаған шығар. Қалай болғанда да оппозицияға келу, оны біріктіру ол оңай шаруа емес.
Әзірге Әлтаевты 19 адамның ішінде Ермұрат Бапи мен Тоғжан Қожалиева қолдап отыр. Жақтастар бас қосып, елді елеңдеткен мәселелерді 1-2 айда бір талқыламақ. Тіркелмеген партия төрағасы "жалғыздың үні шықпайды, сондықтан өзгелермен біріккен дұрыс" дейді.
НҰРЖАН ӘЛТАЕВ, "Ел тірегі" партиясының төрағасы:
– Үлкен өзгеріс керек. Ал ол өзгерістерді көзіміз жетіп отыр тек билікке жеткенде ғана жасауға болады. Қазіргі "Нұр Отан" партиясы мен қазіргі үкіметпен де ешқандай өзгеріс жасау мүмкін емес.
ГҮЛНАЗ САЙЛАУҚЫЗЫ, тілші:
– Оппозиция да біртекті емес, әр текті. Ондағы басты азаматтардың стратегия мен тактикасы да бөлек. Қазақстан оппозициясы "Әділетті Қазақстан" сияқты біртұтас монолит болып біріккен кездер де болды. Бірақ, елде әлі күнге жүйелі, тұрақты оппозиция болған емес.
Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #Нұржан_Әлтаев #оппозиция
