Shefi i Shtabit të Përgjithshëm i FARSH, gjeneralmajor Xhemal Gjunkshi, ka prezantuar komandantët e rinj të Forcës Ajrore, Brigadës së Mbështetjes Rajonale dhe drejtorin e Përgjithshëm të Agjencisë së Inteligjencës së Mbrojtjes, të dekretuar pak ditë më parë nga Presidenti i Republikës, SHTZ Bujar Nishani. Në ceremonitë e organizuara me këtë rast ishin të pranishëm komandantët e forcave dhe njësive kryesore, si dhe drejtorë të drejtorive në Shtabin e Përgjithshëm të FA. Ceremonia e parë është zhvilluar në Komandën e Forcave Ajrore, ku gjeneralmajor Gjunkshi prezantoi komandantin e ri të kësaj strukture të rëndësishme të FARSH, gjeneral brigade Frederik Beltoja. "Ai vjen në këtë detyrë të re pasi ka kryer me dinjitet detyrën zëvendëskomandant i Forcës Ajrore dhe me një eksperiencë të pasur pune në detyra të tjera të rëndësishme në FA. Unë besoj që gjeneral brigade Frederik Beltoja, me cilësitë që e karakterizojnë dhe me mbështetjen tuaj, do të çojë edhe më lart sukseset e Komandës së Forcave Ajrore", - ka theksuar ndër të tjera, gjeneralmajor Xhemal Gjunkshi. Komandanti i Forcave Ajrore, gjeneral brigade Frederik Beltoja ka falënderuar gjeneralmajor Gjunkshin për nderin dhe besimin që i është dhënë duke u emëruar në këtë detyrë të rëndësishme. Atmosfera festive ka vijuar në ambientet e Brigadës së Mbështetjes Rajonale, ku gjeneralmajor Xhemal Gjunkshi ka prezantuar komandantin e ri të kësaj strukture, gjeneral brigade Muhamet Buçpapa. "Besoj se gjeneral brigade Muhamet Buçpapa do të çojë edhe më lart historinë e suksesit të Brigadës së Mbështetjes Rajonale. Unë i uroj gjeneral Buçpapës suksese dhe e siguroj për mbështetjen e vazhdueshme të Shtabit të Përgjithshëm dhe Ministrisë së Mbrojtjes", - ka vlerësuar në fjalën e tij, gjeneralmajor Gjunkshi. Gjeneral brigade Muhamet Buçpapa ka siguruar shefin e Shtabit të Përgjithshëm të FA se struktura e Brigadës së Mbështetjes Rajonale do të përmbushtë me sukses të gjitha detyrat që do t'i ngarkohen nga Shtabi i Përgjithshëm i FA. Ceremonia e zhvilluar në Agjencinë e Inteligjencës së Mbrojtjes ka shënuar mbylljen e prezantimeve të drejtuesve më të rinj të strukturave të FARSH, ku gjeneralmajor Xhemal Gjunkshi ka prezantuar drejtorin e Përgjithshëm, gjeneral brigade Ylber Dogjani. "Unë besoj që gjeneral brigade Ylber Dogjani, me cilësitë që e karakterizojnë dhe me mbështetjen tuaj, do të çojë edhe më lart sukseset e Agjencisë së Inteligjencës së Mbrojtjes në përputhje me kërkesat e standardet e NATO", - ka theksuar para personelit të AIM dhe ftuarve të tjerë, shefi i Shtabit të Përgjithshëm i FARSH, gjeneralmajor Xhemal Gjunkshi. Kreu i sapo emëruar i AIM, gjeneral brigade Ylber Dogjani ka vlerësuar maksimalisht punën e deritanishme të kësaj strukture të rëndësishme si dhe shprehu bindjen se do të përmbushë me sukses të gjitha detyrimet kushtetuese që rrjedhin për AIM, si strukturë dinjitoze e një vendi anëtar të NATO.

свернуть