Bu ilin sonunda Azərbaycan prezidenti İlham Əliyevin İndoneziyaya səfəri gözlənilir. Bu xəbəri İndoneziyanın Azərbaycandakı səfiri Hüsnan Bey Fenani verib.
“İndoneziya ilə Azərbaycan arasında əlaqələr yüksək səviyyədədir. Bu ilin sonunda Azərbaycan prezidentinin İndoneziyaya səfəri gözlənilir. Əslində, səfər bu ilin əvvəlinə planlaşdırılırdı. Amma son dövrlərdə Azərbaycanda keçirilən bir sıra tədbirlər səbəbindən təxirə salındı. Səfərin baş tutacağı günü ümidlə gözləyirik. İndoneziya Azərbaycanın dostu və qardaşıdır, bu da əlaqələrin inkişafı üçün ən böyük təkandır”.
Səfir Azərbaycanın ərazi bütövlüyünü dəstəklədiklərini də bir daha bəyan edib.
“İndoneziya həmişə Dağlıq Qarabağ məsələsində Azərbaycanı dəstəkləyir və dəstəkləyəcək. Dağlıq Qarabağ Azərbaycanın ayrılmaz tərkib hissəsidir”.
Səfir qeyd edib ki, iki ölkə arasında iqtisadi əlaqələr də yüksək səviyyədir: “İndoneziya Azərbaycandan 2,4 milyard dollar həcmində neft alır. Bu, o deməkdir ki, iqtisadi münasibətlər ildən-ilə inkişaf edir”. Səfir sentyabrın 9-dan 11-dək Bakıda keçiriləcək İndoneziya Mədəniyyət Günləri ilə bağlı təqdimat da keçirib. Festivalın açılışı Heydər Əliyev Sarayında olacaq. 2-ci gün isə Dənizkənarı Milli Parkda yürüş keçiriləcək.
"Mədəniyyət Günləri çərçivəsində indoneziyalı rəqqasların və “Miss İndonesia”nın Azərbaycanda çıxışı gözlənilir. Festivalın sonuncu günündə iş adamlarının görüşünün təşkili nəzərdə tutulub”.

свернуть