Кирилл Беляев екі апта бұрын осындай ғажайыптың болатынын сезбеген еді.

Дәрігерлер оның көзіне екі күрделі операция жасап, айналасын анық көру мүмкіндігін сыйлады. Кирилл Есік қаласындағы көзі нашар көретін балаларға арналған мектеп-интернатта оқыған. Енді оған арнайы мектепке қайта барудың керегі жоқ.

Джем Йилдырым, медицина ғылымдарының докторы:

– Кириллдің көзі қыли және қабағы төмен түсіп кеткен екен. Біз аралас операция жасау туралы шешімге келдік. Оңалту кезеңі бір айға дейін созылады. Кириллді қазақстандық дәрігерлермен бірге бақылайтын боламыз. Егер оған осы жерде немесе Түркияда қосымша емдеу шаралары керек болса, көмектесеміз.

Джем Йилдырым – Түркиядан келген профессор. 23 жыл тәжірибесі бар дәрігер көз ауруларына қатысты көптеген операция жасаған. Оның қатысуымен Алматы облыстық №1 балалар үйінің тәрбиеленушісі Светлана Некрасованың көзіне жасалған операция да сәтті өтті.

Светлана Некрасова, Алматы облыстық №1 балалар үйінің тәрбиеленушісі:

– Маған Жаңа жыл мерекесінде керемет сыйлық болды. Операциядан соң көзім жақсы көре бастады. Дәрігерлерге және балалар үйіне алғысым шексіз. Барлықтарыңызды Жаңа жыл мерекесімен құттықтаймын.

Балаларға тегін операция «Help Today» қоғамдық қорының «Шекарасыз денсаулық» бағдарламасы бойынша жасалды.

Авторлары: Гүлжан Көленқызы, Анастасия Вылегжанина, Валентин Лобанов, Радик Джакупов

свернуть