Кәсіптен нәсіп: Qazaqstan ТА мен Ауыл шаруашылығын қаржылай қолдау қорының бірлескен жобасы.

«Мал өсірсең қой өсір, өнімі оның көл-көсір» қағидасын ұстанған кәсіпкер Қарлығаш Мұқышеваның қой шаруашылығымен айналысқанына 13 жыл болыпты. Ұсақ мал болғанымен берері мол. Жүн-терісі, еті, одан қалды сүті, құйрық майы тағы бар.

Бұл жануарға деген сұраныс үнемі жоғары дейді кәсіпкер. Сондықтан шаруашылықты үнемі жаңғыртып отыруға тура келеді. Бұл орайда Қарлығашқа «Ауыл шаруашылығын қаржылай қолдау қоры» көп сеп болып отыр. Қордың тиімді несиесі табысты болуға мүмкіндік берді дейді шаруа.

Қарлығаш Мұқышева - «Батыр» шаруа қожалығының басшысы:

- 2008 жылы шаруа қожалықты аштық. Сол мерзімнен бастап, мал шаруашылығымен айналысуға кірістік. Қазіргі таңда шаруа қожалықтың атында 300 гектар жеріміз бар. Сол жерде малды ұстауға арналған сарайларымыз бар. Жалпы алаң 388 шаршы метрдей құрайды.

Қарлығаш Жұмашқызы қор берген несиеге 200 бас ұрғашы қой алған. Кредитті 16 пайызбен төлеп отыр. Оның 10 процентін мемлекет субсидиялайды. Бұл – ауыл шаруашылығына көрсетілген үлкен қолдау дейді кәсіпкер. Қордан берілетін мұндай мүмкіндіктер аймақта шаруалардың көбейюіне үлкен септігін тигізіп отыр.

Өткен жылы Қарлығаш Мұқышева сынды 60-тан аса тұрғын мал шаруашылығын кеңейтуге ірі көлемде несиеге қол жеткізді.

Әмірхан Смайылұлы - «Ауыл шаруашылығын қаржылай қолдау қоры» АҚ Алматы филиалы басшысының орынбасары:

- Мал шаруашылығын дамытуға арналған бағдарлама 30 млн. теңгеге дейін қарастыратын бұл Ауыл шаруашылығын қаржылай қолдау қорының жеке қаржысы, сондықтан 16 пайызбен беріледі, мерзімі 10 жылға дейін және жеңшлдік кезеңі 2 жылға дейін қарастырылған.

Өткен жылы Алматы облысына қордан 7 млрд-тан астам қаражат бөлініп, 1200 адам несие алған. Биылғы берілген қаражат 5,5 млрд шамасында. Несиелер мал, өсімдік шаруашылығына, ауыл шаруашылығы өнімдерін сақтау және қайта өңдеуге, басқа да бизнес түрлеріне беріледі.

свернуть