Azərbaycan şərabı beynəlxalq miqyasda əvvəlki nüfuzunu bərpa edir. İştirak etdiyi sərgilərdə Azərbaycan şərabçılıq məhsullarının yüksək mükafatlara layiq görülməsi bunu sübut edir. Bu ilin may ayında İtaliyada keçirilən dünya şərab müsabiqəsinə təqdim olunan mindən çox məhsulun içərisində iki Azərbaycan şərabı yüksək qiymətləndirilib. Üzümçülük və Şərabçiliq Elmi-Tədqiqat Institutunun direktoru Tariyel Pənahov deyir ki, həmin müsabiqədə bir Azərbaycan şərabı gümüş medala, «Mədrəsə” şərabı bürünc medala layiq görüldü: «Cəmi iki şərab təqdim etmişdik. Amma ora 1200 şərab təqdim olunmuşdu. Avropa şərablarının içərisində təqdim olunan iki Azərbaycan şərabının belə yüksək mükafata layiq görülməsi bir daha bizə qol-qanad verir ki, bu istiqamətdə geniş tədbirlər görək və işimizi quraq”.
Xaricdəki sərgi və konfranslarda iştirak etməkdə dövlət də istehsalçılara dəstək verir. Belə ki, 2016-cı ilin noyabrından bu ilin aprelinədək şərabçılara 460 min manatdan çox ixrac təşviqi ödənib. Bu il noyabrın 14-16-da Çində şərab və alkoqollu içkilərin sərgisi olacaq. Sərgidə tanınmış şərab brendlərinin beynəlxalq dequstasiyası keçiriləcək. Azərbaycanın mütəxəssisləri də bu tədbirdə iştirak edəcək.
“Xüsusilə, beynəlxalq aləmlə işləmək lazımdır. Hesab edirəm ki, tədbirlərdə aktiv iştirak etməliyik, onların alimlərini dəvət etməliyik. Bunlar elə ölkə prezidentinin öz çıxışlarında, verdiyi göstərişlərdə də öz əksini tapıb. Yolumuz budur. Belə olarsa, ölkələrə ixracımız da artır. Üzümçülüyü, şərabçılığı inkişaf etdirmək üçün yolumuz budur”.
Şərab ixracının artırılması dövlətin prioritet istiqamətlərindən biridir. Təkcə ötən il dövlət büdcəsinə konyak və şərab ixracından 17,5 milyon dollar vəsait daxil olub. Bu ilin ilk yarısında 125 min dekalitrdən çox üzüm şərabı ixrac olunub. Bu, ötən ilin anoloji dövrünə nisbətən 20 faiz çoxdur. eyni zamanda ixrac coğrafiyası və məhsulların çeşidləri genişlənib.
Azərbaycanda şərab istehsalının həcminin artırılması da planlaşdırılır. 2016-cı ildə Azərbaycanda 982 min dekalitr üzüm şərabı istehsal olunub. Bu, bir il əvvəllə müqayisədə 20% çoxdur.

свернуть