Ўзбекистонда эски банкнотадаги пулларни янгисига алмаштириш мумкин бўлади
Марказий банк эски намунадаги танга ва банкнотлар: 50, 100, 200 ва 500 сўмликларни алмаштиришни қайта бошлади.
“Ўзбекистон Республикаси Марказий банкининг эски намунадаги 50 ва 100 сўмлик тангаларини, шунингдек, 50, 100, 200 ва 500 сўмлик банкнотларини айирбошлаш ҳамда муомаладан қайтариб олиш тартиби тўғрисида”ги низомга (рўйхат рақами 3014, 2018 йил 19 май) асосан эски намунадаги танга ва банкнотларнинг муомалада бўлиш муддатлари:
2001-2002 йиллар намуналаридаги 50 сўмлик, 2004 ва 2009 йил намуналаридаги 100 сўмлик тангалар ҳамда 1994 йил намунасидаги 50 ва 100 сўмлик банкнотлар учун 2019 йил 1 июлгача;
1997 йил намунасидаги 200 сўмлик, 1999 йил намунасидаги 500 сўмлик банкнотлар учун 2020 йил 1 июлгача белгиланган.
Марказий банк бошқарувининг 2022 йил 29 январдаги қарорига асосан ушбу эски намунадаги тўлов қобилиятини йўқотган пул белгиларини Марказий банкнинг Ҳисоб-китоб касса марказлари орқали амалдаги пул белгиларига алмаштириб бериш муддати 2023 йилнинг 1 январигача узайтирилган эди.
Бугунги кунда айрим ҳудудларда тўлов қобилиятини йўқотган банкнотларни алмаштириш юзасидан фуқаролардан келиб тушаётган мурожаатларни инобатга олиб, Марказий банк бошқарувининг 2023 йил 3 июндаги тегишли қарорига асосан тўлов қобилиятини йўқотган эски намунадаги 50, 100, 200 ва 500 сўмлик банкнотларни ҳамда 50 ва 100 сўмлик тангаларни Марказий баннинг Ҳисоб-китоб касса марказлари орқали қабул қилиш ва алмаштириб беришни давом эттириш белгиланди.
“Шу муносабат билан, барча фуқаролар қўлида қолиб кетган эски намунадаги тўлов қобилиятини йўқотган юқорида кўрсатилган номиналлардаги банкнотлар ва тангаларни Марказий банкнинг Ҳисоб-китоб касса марказларида амалдаги пул белгиларига эркин алмаштириб олишлари мумкинлигини маълум қиламиз”, дейилади хабарда.
#ўзбекистон#марказийбанк#пулалмаштириш#тезкор#тарқатинг#мухим
