Наурыз мейрамына орай Қазақстанда бұрын-соңды болмаған дрондар шоуы ұйымдастырылды. Түнгі Алматының аспанында көрсетілген ерекше көріністі қалалықтар үлкен таңданыспен тамашалады. Мерекелік кешкі шоу Beeline ұялы байланыс операторының мұрындық болуымен өтті.
ӘЙГЕРІМ ЕРДӘУЛЕТ, тілші:
– Мына тізіліп тұрған 300 дронның көмегімен қалалықтар 8 минут бойы тұңғыш рет Қазақстанда болмаған шоуды бірер сәттен кейін көретін болады. Қазір сақадай сай тізіліп тұрған ақылды техника 90 метр биіктікке көтеріледі екен.
Наурыз мерекесіне орай алматылықтарға шоу көрсетуді құп көрген "Beeline" компаниясы арнайы Ресейден ұйымдастырушыларды шақыртыпты. Алматыдағы Республика сарайының алдынан көкке көтерілген дрондар көрінісі 10 шақырым аумақта анық көрсетілді. Көпшілік, Алматының түнгі аспанында қызғалдақ гүлінің ашылғанын, Қазақстанның картасы мен шаңырақ бейнесін тамашалады.
ВУГАР НАДЖАФ, дрондар шоуының менеджері:
– Бұл шоуды жасауға 3Д-дизайнер, дрондардың анимация жасауын реттейтін IT-маманы және басқарып отыратын екі пилот ат салысты. Дрондар шоуы- бұл от шашудан қарағанда әлдеқайда қауіпсіз шоу жасаудың ең тиімді тәсілі деп білеміз. Шоуға бір ай уақыт тыңғылықты дайындалдық.
Алматылықтарға тосын сый жасаған "Beeline" ұялы байланыс операторының өкілдері күшейтілген карантин кезінде жұртты дәл осы форматта құттықтағымыз келді дейді. «Алматы сіздермен бірге», «Наурыз мерекесі құтты болсын» деген жазуларды да ұшақсыз ұшатын құрылғының көмегімен жазуды ұмытпағандарын айтады.
МАКСИМ ЦВЫКОВ, Beeline ұялы байланыс операторының маркетинг бойынша директоры:
– Наурыз ол көпшілікті біріктіретін мейрам. Біздің компанияның негізгі ұстанымы да сол, яғни ел азаматтары қай өңірде болмасын үнемі байланыста болғанын қалаймыз. Қазақстандықтарды қуанту үшін үнемі ерекше дүниелерді ойлап тапқанды жөн көреміз. Бұл жолы дрондар шоуына тоқталдық.
Ерекше кеш қалалықтарға шын мәнінде тосын сый болғандай. Көпшілік, шоуды басынан аяғына дейін зор таңданыспен тамашалады.
Әйгерім Ердәулет, Ринат Әбілқайыров
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #басты_жаңалықтар
