هێزی پێشمەرگە لە کەرکووک فڕۆکەیەکی سوپای عێراقیان خستە خوارەوە کە "بە مەبەستی سیخوڕی" نێردرابووە ناوچەکە.
سەرچاوەیەک لە لیوای 1ی هێزی پێشمەرگە کە لە دەورووبەری کەرکووک جێگیر کراوان، بە (رووداو)ی راگەیاند "کەمێک پێش ئێستا هێزی پێشمەرگە تەقەیان لە فڕۆکەیەکی بێ فڕۆكه‌وانی سوپای عێراق کرد و خستیانە خوارەوە".
ئەو سەرچاوەیەی هێزی پێشمەرگە کە نەیوسیت ناوی ئاشکرا بکرێت، راشیگەیاند "ئەو فڕۆکەیە به‌مه‌به‌ستی پشكنین و چاودێریكردنی هێزی پێشمه‌رگه" هاتبووە ناوچەکەوە".
هەروەها پاش نیوەڕۆی ئەمڕۆ سێ شەممە، هێزی پێشمەرگە تەقەیان لە فڕۆکەیەکی بێ فڕۆکەوانی سوپای عێراق کردبوو کە بە بەسەر بەرزاییەکانی (دۆمەڵان)دا سووراوەتەوە و ویستبووی زانیاری له‌سه‌ر هێزه‌كانی پێشمه‌رگه لە ناوچەکە كۆبكاته‌وە.
وەزارەتی پێشمەرگە وێڕای پشتڕاستکردنەوەی ئەو هەواڵە، رایگەیاندووە "هێزی پێشمەرگە فڕۆکە سیخوڕییەکەی سوپای عێراقی ناچارکرد لە ناوچەکە جێ بهێڵێت".
