Rruga e Kombit është ndërtuar në kundërshtim të kushteve teknike. Nisur nga numri i lartë i aksidenteve të shënuara gjatë këtij viti, inxhinierët thonë se rruga është ndërtuar me probleme në pjerrtësinë e trasesë dhe rrezen e vogël të kthesave.
Ky është konkluzioni i specialistëve të ndërtimit të rrugëve, të cilët thonë se Rruga e Kombit ka një sërë problematikash të cilat duhet të ishin evituar që në ndërtimin e saj. Pjerrtësia e trasesë dhe rrezja e vogël e kthesave, sipas tyre bëhen faktorë për shkaktimin e aksidenteve.
Në këtë segment të autostradës kanë ndodhur dhjetëra aksidente me pasojë humbjen e jetëve njerëzore, ku vetëm pak ditë më parë humbën jetën babë e bir dhe një i afërm i tyre.
Ndryshe nga sa ka ndodhur në rrugën e vjetër Kukës-Tiranë, përmes qafës së Malit, në autostradën Klimash-Kukës-Morin, kanë ndodhur vetëm gjatë këtij viti më shumë se 13 aksidente me 13 viktima dhe 25 të tjerë të plagosur.
