Қасым-Жомарт Тоқаев бүгін қоғамда үлкен резонанс тудырған, ел ішінде аса өзекті мәселелерге арнап ұлттық қоғамдық сенім кеңесін өткізді. Отырыста президент адам құқығы, банктердің кепілді бағалау саясаты, әкімдер сайлауы, цифрлы технологияларды дамыту сияқты саяси, әлеуметтік-экономикалық мәселелерге тоқталды. Ал кеңес мүшелері белгілі бір салаға қатысты өзгерістерін ұсынды.
Нұр-Сұлтан, Алматы, Шымкент, Ақтау. Биылғы Ұлттық кеңестің 6-отырысы карантинге байланысты онлайн форматта өтті. Сөйтсе де, жиында елдегі қоғамдық-саяси, әлеуметтік мәселелер рет-ретімен айтылды. Ату жазасын түбегейлі алып тастау, полицияның ашықтығы үшін бейнекамералар орнату. Кеңестің әр мүшесінің өз айтары бар. Қайсар Тұрсынқожа баспана мәселесі халықтың негізгі проблемасына айналғанын баса айтты. «Алматы жастары», «Елорда жастары» сынды бағдарламалар ел бойынша жүзеге асырылса, сондай-ақ, пайыздық мөлшерлеме төмендеп, несие мерзімі ұзартылса деген ұсыныс білдірді.
ҚАЙСАР ТҰРСЫНҚОЖА, «Team Kazakstan» жастар қозғалысының белсендісі:
– «Жас отбасы» деген бағдарламаның мөлшерлемесі 6 пайыз. Алайда бастапқы жарнасы 50 пайыз. Жаңадан отау құрған жастарға бастапқы жарнаны жинау қиындау. Оны жинап үлгергенше жас отау жалақысының басым бөлігі пәтерақыға кетеді. Бастапқы жарнаны азайту керек.
Жиын барысында медицина саласында 4 мыңға жуық қызметкер тапшы екені айтылды. Өйткені аймақтарда оларға қажетті жағдай жасалмаған. Өңір әкімдері осы мәселемен белсенді түрде айналысуы тиіс деп, президент тапсырма берді. Сондай-ақ, жалғызбасты ата-аналарға да оңтайлы жағдай қарастырылуы керек. Қашықтан жұмыс істеуі мен қысқартылған жұмыс істеу құқығын енгізу арқылы бала қауіпсіздігі қамтамасыз етілмек. Тағы бір түйткілді мәселе, қағазбастылықтан арылып, цифрлық сауалттылықты арттыру.
ҚАСЫМ-ЖОМАРТ ТОҚАЕВ, Қазақстан республикасының президенті:
– Қарапайым мәселені мемлекеттік органдар өздері қиындатып отыр. Электронды үкіметтің базасына әкімдіктер, Білім және ғылым министрлігінің ақпараттық жүйелерін қосу керек. Сонда Халыққа қызмет көрсету орталықтарының жұмысын жеңілдетеміз. Азаматтардың уақытын үнемдейміз.
Елде қоғамдық сенім кеңесі басталғаннан бері саяси реформалар туралы айтылған еді. Мәжілісмен Айдос Сарымның айтуынша, ол реформалар жүзеге асып жатыр.
АЙДОС САРЫМ, ҚР парламенті мәжілісінің депутаты:
– Менің ойымша саяси реформалар талқыланып та жатыр. Олар 4 пакет дегенді президент айтты ғой. Сондықтан оның көбісі заң дәрежесінде, заң жобасы дәрежесінде талқыланып жатыр. Яғни, олар іс жүзінде жүзеге асырылып жатыр деп айтуға болады.
Кеңесте айтылған мәселелер үкіметтің әрбір тиісті ведомстволарына тапсырылады. Өйткені, бүгінгі кеңесте алты бағытта отызға жуық тапсырма айтылды.
.
.
.
.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #басты_жаңалықтар #Ақиқатын_Айтайық
