*Айбек Қалиев*
Ақтарып ақиқатты нақты ағайын,
Мен біраз мәселеге тоқталайын.
Биылғы жыл Ахаңның жылы емес пе,
Ұлт ұстазы даңқымен мақтанайын.
Тойына 85 күн уақыт қалды,
Ұлы тойға дайындық жоқ па ағайын.
Тоз-тоз болған Торғайда той болмақ деп,
Қазаққа қай бетіммен шаттанайын.
Ахаңның ауылына апаратын
Жол жоқ деп мен қалайша ақталайын.
35 шақырымға қаржы тапқан,
Архимедті десем де даттамайын.
Қалғанына қаржы жоқ деп отырса,
Онысын да дұрыс деп жақтамайын.
Ол жолдың өзі әлі басталған жоқ,
Жоспарлаулы қағаз бен хатта ағайын.
100 шақырым жол салып бере алмаса,
Ұят қой Қазақстан атқа ағайын.
Ахаңның туған үйін жаңартуға,
Тендер ұтып біреулер кепті ағайын.
Үгітілген кірпішпен құрлыс бастап,
Оның да соңы құн-жұн бопты ағайын.
Тышқақ байлар тұратын коттедждер,
Ахметке бұйырмай қапты ағайын.
Біздегі дайындықтың түрі осындай,
Мен қандай салтанатпен баптанайын.
Ұлтымыздың сауатын ашқан ерге,
Құлқымыздың жоқтығы батты ағайын.
Еститін үкіметім естір ме екен,
Айқайлап арызымды ақтарайын.
Ахмет, Ахмет деп қақсайсыңдар,
Сөз басын Міржақып деп бастайсыңдар.
Ал енді солар туған қарт Торғайға,
Баруға бірің аяқ баспайсыңдар.
Тоз-тоз болған Торғайды қашанғы енді,
Тағдырдың тепкісіне тастайсыңдар.
Секілді елдің қоры, жердің кемі,
Неліктен облысын ашпайсыңдар.
Жолы жоқ, газы да жоқ, ауыз су жоқ,
Бізді енді қай тозаққа бастайсыңдар.
Ресейге жалға беріп полигон ғып,
Төбеден қоқыс төгіп ластайсыңдар.
Амангелді, Кейкіні туған елдің,
Намысын аяқасты таптайсыңдар.
Жыл сайын Елбасының туған күнін,
Күміс күптеп, алтынмен аптайсыңдар.
Ахметке келгенде ауызды құр,
Қу шөппен сүртіп қаржы таппайсыңдар.
Ұлтқа дәл Ахметтей қызмет еткен,
Азамат жоқ екенін қақпайсыңдар.
Көсемге лайық құрмет көрсетпесең,
Күні ертең көрде тыныш жатпайсыңдар.
Торғай тегін ел емес ей үкімет,
Оянып көздеріңді ашқайсыңдар.
Ахметтің елінен қашқанменен,
Ақыреттің күнінен қашпайсыңдар!
