الكلمات :
ياسايق الكيف خل الكيف ينساق دول
الصدر هذي ثلاث ليال ماهو خلي
امهيلات القصيد الجزل كيف العقول
فنجالها مع هل الابداع ينساقلي
والشعر في لازم الطيّب يقول ويطول
يقلط على اهل المواقف مايلقّى الخلي
مجد مخلد مثل ضلعً رسى مايزول
والطيب وقفة ظفر والحق وجه جلي
ناصر بن هندي
خلك معي لين اصوغ ابيوت واثبت فعول
بالمذهب الشافعي والمذهب الحنبلي
فُضاء بتاريخ جدانه وفعله يقول
لو الفخر مال فاض حسابي الممتلي
في مكتبه له قبول ومجلسه له قبول
تامن به الهقوه اللي رتمها معتلي
اليا رضا شفت لاهل الراي رايه وضول
واليا زعل عرض اسباع الرجال الخلي
من طيب شخصيته صاب القوافي ذهول
من حظ سنه محمد خل شيعة علي
منصور الميخار
و يا ابو فُضاء يا ذرا اللي من زمانه جفول
كنك تقول آقلطو في مجلسي وعملي
سبحان من ميزك على جميع الاصول
بمميزاتُ كثر و اهمها مايلي
اسمً يهز المواكر فووق روس القذول
و راسً حماياه تنضح والعروق تغلي
ان جيت للطيب والله ماعرف ويش اقول
الطيب ماينحصي والمجد كفه ملي
وان جيت للمرجله .. واللي عرج بالرسول
انّا نشوفك .. على هاماتها معتلي
فيصل بن نماس
من روس ربعي هل القوه جمال الحمول
من جدنا رياح تلقى العود عقبه شلي
إسم الرياحات لو زالت دول مايزول
الاسم ماضي وحاضر عز مستقبلي
اسمن يقلط له زحول ويهيب زحول
وصوت العزاوي يحدد وقته المفصلي
حنا سهوم المنايا في الزمان المهول
يوم ان بقعاء على روس الفتن تبتلي
ناقف لها وان تعلينا سروج الخيول
للسيف حجه على روس العدا تنطلي
فيصل العليمي
