CBC xəbər verir ki, dövlət başçısı Özbəkistan Prezidenti İslam Kərimovun vəfatı ilə əlaqədar başsağlığı verib, matəm kitabına ürək sözlərini yazıb. Prezident İlham Əliyev Özbəkistanın Azərbaycandakı səfiri Şerzod Fayziyevlə söhbət edib və ona başsağlığı verib.
Özbəkistan səfirliyində matəm kitabı sentyabrın 3-də açılıb. Bu günlər ərzində onlarla insan, ictimai və siyasi xadimlər, xarici ölkələrin Azərbaycanda akreditə olmuş diplomatik nümayəndəlikləri səfirliyə gedərək, özbək xalqına başsağlığı verib və xatirə kitabına ürək sözlərini yazıblar.
Azərbaycan-Özbəkistan Dostluq Cəmiyyətinin sədri Zemfira Kadırova CBC-yə açıqlamasında Özbəkistan prezidentinin ölümündən çox təsirləndiyini bildirib: “Özbəkistan Respublikasının Azərbaycandaki səfirliyinə başsağlığımızı verməyə gəlmişik. Cənab səfir, səfirliyin işçilərinə, bütün qardaş özbək xalqına başsağlığı veririk. Çox böyük itkidir, çünki 25 il müstəqil Respublikanı idarə etmək, ancaq böyük şəxsiyyətlərə qismət olur. O böyük şəxsiyyətlərdən biri də İslam Kərimov idi”.
Özbəkistan Səfirliyinin binasındakı dövlət bayrağı yarıya qədər endirilib. Ölkənin milli bayramı - Dövlət Müstəqilliyinin 25-ci ildönümü münasibətilə sentyabrın 6-da Bakıda keçirilməsi nəzərdə tutulan rəsmi qəbul isə ləğv edilib.
Ещё видео!