غياب البطل


الاهي انا في ظل عرشك من التقصير
ومن فكرةٍ ماهيب تستاهل ابداعي

انا عبدك اللي كل ما أسمع التكبير
أحس بحياةٍ ثانية داخل أضلاعي

ياربي جباروتك دعاني على التفكير
وعرفت إني بدونك لـ نايم ولا واعي

لجا ابليس والدنيا يمسونني بالخير
تبسّمت وأقفيت وقعدت أصفق اصباعي

يامولاي سرٍ بينك وبيننا في بيـر
واعزّتْـك ماينقل على منكب الساعي

مادامك تعرف ان نيتي ماوراها اسبير
فعطني على نيتي لاخرّيت لك داعي

الا يالله بقافٍ اركونه مناكب جير
على هدّته نوماس صيفي ومرباعي

من الثقل كنه واحدٍ من شيوخ مطير
ومن الشر كن عيونه عيون سبّاعي

علي الملام ان خانني الشعر و التعبير
وعداني الملام اليا حمت وجهي اذراعي

مـ ضاعت لنا خلف العدا غزلةٍ لـ بعير
وخلف الرفاقة خيرة الطرش ضيّاعي
.
انا لازمٍ احفظ رعيتي ضحى وعصير
لاراحت رعيتي من يديني من اراعي ؟

اشوف الاوادم ذالزمن صابها تخدير
تصفق مع القاتل وتنعى مع الناعي

غياب الجبان من الكتيبه بلا تأثير
وغياب البطل يثّر على الشيخ والراعي

سلامي على اللي سيرته في عيون الغير
مزونٍ ضربها برقي وهب ذعذاعي

من اطباعي اني ضد الإسراف والتبذير
ومدحي فابن لبدان بيغيّر اطباعي

عبر ذكره المجلس وانا عمس من لاخير
وعطيت المسولف وجهي ونشت مقداعي

أكيّف على مدح الكفو وارتفع واطير
ومدح ابرق الجنحان هو سبّة اصداعي

أحب الرفيق اللي بوجهه يشاف الخير
ياكيف ابن عمٍ طابق اسناعه اسناعي

إلآمن نوا لـ اخصام جاهم حسن تدبير
واذا عف لو يدعون ماجاوب الداعي

على وجهه من الدين والمرجلة تأثير
وعلى عينه اللي ماهو بياعي بياعي

لو انه لحق وقت النبي ممكن انها تصير
رواة السنن لأبو هريرة وأبو ثاعي

مامنه سوا نسخه ولا تقبل التكرير
ليامن تكرر مجد من مجده اصناعي

يـ عالم هذا غير وخلق في زمانٍ غير
فلا تـلزمونه حاجةٍ مالها دااااعي

يسوق المدايح دافع الحب والتقدير
ماسقت المدايح لجل تحسينة اوضاعي




كلمات :
فيصل البلداء




اداء :
جفران بن هضبان





تنفيذ :
اهتمام الدوسري



..

من فضلك : اشتراك 🔔 Subscribe - لايك Like
فعل الجرس 🛎 ليصلك كل جديد

تصميم : اهتمام الدوسري
______________________

للتواصل والاستفسارات :
الحسابات الرسمية لـ قناة اهتمام الدوسري .

‏SNAPCHAT : P.5BF


‏Whatsapp : ‭050 608 9787‬









#غياب_البطل
#ابن_لبدان
#جفران_بن_هضبان

свернуть