«Այսօր բուհի կյանքում կարևոր իրադարձություն է, քանի որ շրջանավարտների աշխատանքների ցուցադրությունը այս պատվավոր ցուցասրահում երևույթ է և իսկական հաղթանակ ուսանողների համար»,-նշեց ՀՊՄՀ-ի ռեկտոր Ռուբեն Միրզախանյանը Նկարիչների միությունում այս տարվա Գեղարվեստական կրթության ֆակուլտետի շրջանավարտների աշխատանքների ցուցահանդեսի բացման ժամանակ՝ հույս հայտնելով, որ նման ձեռնարկները կլինեն շարունակական:
Ռեկտորը բարձր գնահատեց Կերպարվեստի ամբիոնի վարիչ Փարավոն Միրզոյանի դերակատարումը, ինչի արդյուքնում եղան բազում ձեռքբերումներ, մասնավորապես՝ 6 երկրների անվանի նկարիչների և ֆակուլտետի 12 ուսանողի մասնակցությամբ գեղանկարիչների միջազգային պլեները:
«Բուհը կձեռնարկի հնարավոր բոլոր քայլերը, որ Բոլոնյան կրթական համակարգի պայմաններում ֆակուլտետի ուսանողները հնարավորություն ունենան 1 կիսամյակ սովորելու աշխարհի առաջատար հաստատություններում»,-վստահեցրեց ռեկտորն ու ուսանողներին հորդորեց տաղանդավոր լինելուց բացի, տիրապետել օտար լեզուներին և նորագույն տեխնոլոգիաներին, իսկ բուհը կշարունակի վարել ուսանողակենտրոն քաղաքականություն և ճանապարհ հարթել լավագույնների համար:
Գեղանկարներ, գրաֆիկաներ և այլ ժանրի 82 աշխատանք 3 օր կցուցադրվեն Նկարիչների միությունում, ինչը աննախադեպ և բացառիկ իրադարձություն է Գեղարվեստական կրթության ֆակուլտետի պատմության մեջ:
Նկարիչների միության նախագահ Կարեն Աղամյանն ուրախալի համարեց շրջանավարտների աշխատանքների ցուցադրությունը՝ վստահեցնելով, որ Միության ցուցահանդեսների մեծ մասի հեղինակները Մանկավարժականի շրջանավարտներից են եղել և կան, ինչը վկայում է բուհի տված բարձր գիտելիքի և կրթության որակի մասին:
«Այս տարվա շրջանավարտներն այնպիսի հաջողության հասան, որը նոր ճանապարհ կհարթի նրանց կյանքում. ցուցահանդեսը ուսանողների մասնագիտական առաջին քայլն է, ինչին ջանասիրաբար և մեծ նվիրումով նրանք ձգտել են 4 տարի շարունակ»,-նշեց Կերպարվեստի ամբիոնի վարիչ Փարավոն Միրզոյանը և այդ գործում կարևորեց նաև բուհի ղեկավարության՝ մասնագիտության հանդեպ հետևողական աշխատանքն ու ուշադրությունը:
Շրջանավարտների 137 աշխատանքները ընտրել և գնահատել է ամփոփիչ ատեստավորման քննությունների հանձնաժողովը, որի նախագահ, վաստակավոր նկարիչ Հաղթանակ Շահումյանը ցուցադրության բացմանը վստահեցրեց. «Անկախ այն բանից, թե երիտասարդ արվեստի մշակները ինչով կզբաղվեն՝ մանկավարժական գործունեությամբ, թե արվեստով, միևնույն է, կնպաստեն մեր ժողովրդի մշակույթի զարգացմանն ու տարածմանը»:
Վաստակավոր նկարիչը ցանկություն հայտնեց, որ այսօրվա ոգևորությունը երիտասարդ ստեղծագործողներին ուղեկցի ողջ կյանքի ընթացքում՝ նպատակադրելով հայկական մշակույթը հարստացնել նկարիչների նոր անուններով և բարձրարժեք ստեղծագործություններով:
Շրջանավարտները շնորհակալություն հայտնեցին պրոֆեսորադասախոսական կազմին իրենց վարպետությունն ու գիտելիքները փոխանցելու համար և վստահեցրին՝ մեծ պատվով են ստանալու ՀՊՄՀ-ի դիպլոմը: Նրանք միակարծիք են՝ աշխատանքներում կա սեր, նվիրում, ղեկավարի և ուսանողի մեծ բարեկամություն:
«Ցուցահանդեսը մեզ համար հաղթանակ է»,-հպարտությամբ նշում են նորաթուխ նկարիչներն ու խոստովանում՝ այն նաև պարտավորեցնում է, որ կատարելագործեն ունակություններն ու նպատակ դնեն հետագայում ևս հանդես գալ որպես անհատական նկարիչներ:
