ئه‌مریكا داوای دواخستنی ریفراندۆمه‌كه‌ی هه‌رێم ده‌كات و نێرده‌ی نه‌ته‌وه یه‌كگرتووه‌كانیش خوازیاره هه‌ولێر و به‌غدا بۆ چاره‌سه‌ركردنی كێشه‌كانیان بگه‌نه رێكه‌وتن , ئێرانیش پشتیوانی بۆ یه‌كپارچه‌یی خاكی عێراق دووپاتده‌كاته‌وه.
له كۆبونه‌وه‌یه‌دا له‌گه‌ڵ بزوتنه‌وه‌ی گۆڕان، دۆگڵاس سیلیمان باڵیۆزی ئه‌مریكا له عێراق ڕایده‌گه‌یه‌نێت: واشنتۆن داواده‌كات ریفراندۆم بۆ كاتێكی تر دوابخرێت، چونكه ئه‌مریكادان به ئه‌نجامی ئه‌و ریفراندۆمه‌دا نانێت.
به پێچه‌وانه‌ی هه‌ڵوێستی حكومه‌تی ئه‌مریكاوه مه‌سعود بارزانی رایده‌گه‌یه‌نێت ریفراندۆمه‌كه‌ی هه‌رێم له‌واده‌ی خۆیدا به‌ڕێوه‌ده‌چێت.
بارزانی له كۆبونه‌وه‌یدا له‌گه‌ڵ یان كۆبیچ نێرده‌ی نه‌ته‌وه‌یه‌كگرتووه‌كان له عێراق رایگه‌یاندووه ریفراندۆم بڕیاری گه‌لی كوردستانه‌و مافێكی یاسایی و سروشتییه‌و له‌كاتی خۆیدا به‌ڕێوه‌ده‌چێت.
تیمی نه‌ته‌وه‌یه‌كگرتووه‌كانیش یۆنامی له راگه‌یه‌نراوێكدا رایگه‌یاندووه له و كۆبونه‌وه‌یه‌دا یان كۆبیچ د‌وخی سیاسی عێراق و هه‌رێمی له‌گه‌ڵ بارزانیدا تاوتوێكردووه و جه‌ختیكردوه‌ته‌وه له‌سه‌ر هه‌ڵوێستی رێكخراوه‌كه به‌رامبه‌ر به ریفراندۆم و رایگه‌یاندووه هانی ئه‌و هه‌وڵانه ده‌ده‌ن كه ده‌درێن بۆئه‌وه‌ی هه‌ولێر و به‌غدا بۆ چاره‌سه‌ركردنی هه‌موو كێشه هه‌ڵواسراوه‌كان بگه‌نه لێكتێگه‌یشتن.
له‌سه‌ر ئاستی ناوچه‌یش حكومه‌تی ئێران جارێكی تر هه‌ڵوێستی خۆی ده‌رباره‌ی ریفراندۆمه‌كه‌ی هه‌رێم دووپاتكرده‌وه.
به‌هرام قاسمی وته‌بێژی وه‌زاره‌تی ده‌ره‌وه‌ی ئێران له كۆنگره‌ی رۆژنامه‌وانی هه‌فتانه‌یدا رایگه‌یاند تاران هیواداره دانوستانه‌كانی هه‌ولێر و به‌غدا به‌رده‌وام بن و ئه‌نجامی ئیجابیان لێبكه‌وێته‌وه.
قاسمی جه‌ختیشیكرده‌وه هه‌ڵوێستی ئێران ئاشكرایه و تاران پشتگیری له یه‌كپارچه‌یی خاكی عێراق ده‌كات و هیواداریشه ئاستی به‌رپرسانی عێراقی بگاته ئه‌وه‌ی دۆخهی ناوچه‌كه به‌ره‌و ئاڵۆزی زیاتر نه‌چێت.
→ website: [ Ссылка ]
→ Facebook: [ Ссылка ]
→ youtube: [ Ссылка ]
→ Instagram: [ Ссылка ]
