Dövlət Gömrük Komitəsi ilə Azərbaycan Dövlət iqtisad Universiteti arasında kadr potensialının gücləndirilməsi sahəsində əməkdaşlıq memorandumu imzalandı.
İmzalanma Azərbaycan Dövlət İqtisadi Universitetində keçirilən "İqtisadi təhlükəsizlik: ticarətin asanlaşdırılması və mühafizəsi aspektləri” adlı elmi-praktiki konfrans çərçivəsində baş tutdu. Komitəsinin sədri Aydın Əliyev bildirdi ki, peşəkar kadrların hazırlanması və onların potensialının artırılması gömrük orqanlarının qarşısında duran əsas vəzifələrdəndir. Bu sahədə Dünya Gömrük Təşkilatı ilə də sıx əməkdaşlıq qurulub.
Qeyri-qanuni ticarətin leqallaşdırılmasının mütləq olduğunu deyən Dünya Gömrük Təşkilatının baş katibi Kunio Mikuriya bildirdi ki, Azərbaycan gömrüyü regional liderdir.
Milli Məclis sədrinin birinci müavini Ziyafət Əsgərov bildirdi ki, Azərbaycanda idxal-ixrac əməliyyatlarının aparılmasında, iqtisadi plan və göstəricilərin yerinə yetirilməsində gömrük orqanlarının xüsusi rolu var.
Konfransa 10-dan çox ölkənin və Dünya Gömrük Təşkilatı mütəxəssislərinin 27 məruzəsi təqdim olunub. Tədbirdə çıxış edənlər iqtisadi təhlükəsizliyin təmin olunması ilə bağlı fikirlərini bölüşüblər.
