من كام يوم كده، اسكندرية كانت بتتلكم عن جريمة بشعة، سواق تكتك 39 سنة دبح مراته 25 سنة قدام ابنهم رغم توسلات الأبن بسبب شكه في سلوكها، وبعد ما دبحها، حاول الزوج انه يقطع جسمها حتت علشان يخفي جريمته بس للأسف صحته ما ساعدتوش وتعب. فقرر انه يفصل راسها عن جسمها، وأخد جثتها في التكتك وراح رماها ناحية عمارات تعاونيات سموحة، واحتفظ براس مراته في التلاجه، المهم الشرطة توصلت لسائق التكتك واتقبض عليه.
السؤال هنا بقى هل يستم الحكم على هذا الزوج بالاعدام، أو بمعنى أصح هل عقوبة الإعدام هي العقوبة المقررة لجريمة القتل العمد، ولا لازم تتوافر ظروف تانيه علشان القاتل يتعدم، ده السؤال اللي حنحاول نجاوب عليه النهاردة.
في الحقيقة جريمة القتل العمد معاقب عليها بالسجن المشدد ومش الإعدام، أه ولاهي زي ما بقولك كده، يعني انت لو اتخانقت مع واحد في الشارع وقررت انك تقتله وانت بتتخانق معاه بسبب انه أهانك فضربته على دماغه بالكوريك مثلاً كذا مرة لحد ما مات مش حتتعدم. يا سلاااااام اومال مين بقى اللي يتعدم لو ماكنش الراجل ده.
لازم نعرف أن كتير من الجرائم بيكون ليها صورة بسيطة وليها صورة أخرى مركبة، يعني لو واحد قتل واحد قتل عمد ديه تعتبر جريمة بسيطة (الصورة الطبيعية للجريمة) ويعاقب على ذلك بالسجن المشدد زي ما قلنا، لكن لو واحد قتل واحد تاني مع سبق الإصرار أو الترصد فسيتم تشديد العقوبة عليه. لأن الظروف ديه اسمها ظروف مشددة بتشدد العقوبة في جريمة القتل، لتصل إلى الإعدام عوضاً عن العقوبة العادية للجريمة في صورتها البسيطة.
طب ايه هو الإصرار: الإصرار هو انك تصمم على فعل الشئ، يعني ان انت تبقى واخد قرار مسبق ان انت تقتل فلان وفكرت كذا مرة وانتهى وجدانك لارتكاب الجريمة، فلو عملت كده تبىقى انت ارتكبت الجريمة مع سبق الإصرار، أما الترصد فهو شئئ مختلف حبتين، وهو انك تاخد القرار بالقتل وتستنى اللي انت عايز تقتله في حته لحد ما يظهر تقوم قتله، والترصد بوصفه ده... ظرف مشدد بيوصل عقوبة القتل للإعدام، زي ما ساعات بنقول ( ده لابد له في الدره) يعني القاتل مستخبي للي عايز يقتله في الدره لحد ما يظهر علشان يقتله، المقولة ديه بتعبر عن الترصد.
وزي ما في ظروف مشددة، في حاجة تانيه عكسها اسمها ظروف مخففة بتدخل على الجريمة البسيطة علشان تقلل العقوبة بتاعتها لاعتبارات خاصة بالمشرع، زي مثلاً ما بيخفف المشرع عقوبة جريمة القتل على الأحداث وصغيري السن يعني لو حدث عنده 14 سنة ارتكب قتل عمد ممكن يتحبس عدد سنوات اقل علشان شخصيته لسه ماتكونتش، ومن تطبيقات ده برده حاجة اسمها الأعذار القانونية.. زي مثلاً اللي بيدخل على مراته حال تلبسها بالزنا فيقتلها هي ومن يزني بها، ففي هذه الحالة بتخفف عقوبة القتل العمد من السجن المشدد للحبس مدة لا تزيد عن سنة، وغالباً ما بيحكم القاضي في هذه الجريمة بسنة مع وقف التنفيذ.
نرجع بقى للمثال بتاعنا والراجل اللي حط راس مراته في التلاجه... هل هو ارتكب جريمة قتل مشددة ولا مخففة ولا قتل بسيط، لأن العقوبة حتختلف مش كده ولا ايه.... تعالوا نسترجع الحادثة، هو كان بيتخانق مع مراته فقتلها، هل هنا في سبق إصرار انه يقتلها... الطبيعي انه لأ هو كان بيتخانق معاها والأمر تطور فقتلها... فكرة القتل عند سائق التكتك كانت وليدة اللحظة، طب هل عنده ترصد... بردو لأ هو كان في البيت وبيتخانق معها عادي، يبقى هنا تعتبر جريمة السائق قتل عمد بسيط من غير ظروف مشددة ولا مخففة...
يا نهار أسود... يعني الراجل دبح الست قدام ابنها ورمى جثتها في الزبالة وشال راسها في التلاجه وتقوللي قتل بسيط، أومال القتل الشديد يبقى عامل ازاي.؟؟؟
في الحقيقة اللي عمله الزوج ده يعتبر من قبيل التمثيل بجثة زوجته، والتمثيل بالجثث لا يعاقب عليه القانون المصري ان اقترن بالقتل، هي حكاية التمثيل بالجثة بعد قتلها بتعتبر ظرف مشدد بس في تشريعات تانية زي التشريع العقابي بتاع افريقيا الوسطى اللي بيشدد التمثيل بالجثث بعد ارتكاب جريمة القتل، احنا في مصر بنشدد عقوبة جريمة القتل في حال ما تم ارتكابها بواسطة استخدام السم أو انها تكون اقترنت بجناية او جنحة أو إصرار أو ترصد.
قوليلي ايه رأيكم في الموضوع ده في الكومنت، ولو حد عنده اقتراح معين بالنسبة لظروف وأحوال معينة هو شايف ان المفروض يتم تشديد جريمة القتل تعويلاً عليها.... وساعدوني في اختيار الموضوعات لو في أي حاجة انتم حابين ان احنا نتكلم عنها، وهل الكلام في العموم كده مناسبكم ولا حابين تعمق أكتر.... اسيبكم على خير واشوفكم الأسبوع الجاي باذن الله.
سفاح الجيزة
