“Dədə Qorqud irsi”nin YUNESKO-nun xüsusi siyahısına daxil edilməsi yalnız Azərbaycan, Türkiyə və Qazaxıstanın deyil, bütün türk dünyasının uğuru sayılmalıdır”. YUNESKO-nun Qeyri-maddi mədəni irsin qorunması üzrə Hökumətlərarası Komitəsinin 13-cü sessiyasında qəbul edilən qərarı şərh edən tədqiqatçılar belə deyirlər. Azərbaycanın Türkiyə və Qazaxıstanla birgə təqdim etdiyi “Dədə Qorqud irsi: Dastan mədəniyyəti, xalq nağılları və musiqisi” çoxmillətli mədəniyyət nümunəsinin YUNESKO-nun Qeyri-maddi mədəni irs üzrə Reprezentativ Siyahısında yer almasını yüksək dəyərləndirirlər.
“Dədə Qorqud” dastanı hər üç ölkədə birlik, bərabərlik və müxtəlifliyi, həmçinin xalqlarımızın ailə dəyərlərini, qadının cəmiyyətdə rolu, qonaqpərvərlik və ədalət prinsiplərini ifadə edir.
YUNESKO-nun Azərbaycanla bağlı bütün müzakirələrində olduğu kimi bu dəfə də, Ermənistan təxribata cəhd edib. Bu ölkənin təmsilçisi Azərbaycanla bağlı məqamlara qarşı çıxıb. Qarabağın Azərbaycanın ərazisi kimi qeyd edilməsinə etiraz etməyə çalışaraq, bu məsələni siyasiləşdirməkdə ittiham edib. Ermənistan təmsilçisinin bu yersiz müdaxiləsi nəticəsiz qalıb və komitə üzvləri sənədi yekdilliklə dəstəkləyiblər.
Azərbaycan nümayəndə heyəti Ermənistan tərəfinin qeyri-konstruktiv və yersiz mövqeyinin yolverilməz olduğunu bir daha diqqətə çatdırıb.
Mütəxəssislər bildirir ki, Dədə Qorqud dastanı Azərbaycan üçün indi xüsusi önəmə malikdir və Ermənistanın bu dastanın YUNESKO siyasına salınmasından narahat olması təsadüfi deyil.
“Dədə Qorqud irsi” ilə yanaşı, hazırda kamança hazırlanması və ifaçılıq sənəti, dolma hazırlama və paylaşma ənənəsi, muğam ifaçılığı, lavaş bişirmə və paylaşma ənənəsi, Lahıc misgərlik sənəti, aşıq sənəti, Novruz bayramı, xalça sənəti, tar ifaçılığı və kəlağayı sənəti YUNESKO-nun Qeyri-Maddi Mədəni İrs üzrə Reprezentativ Siyahısında yer alır.
