Тұмаумен балалар жиі ауырады. Бүгінгі күні 31 адам тұмауға шалдықса, оның басым бөлігі балалар. Жүкті әйелдер дін аман. Дегенмен санитар-эпидемиолог мамандар өткен жылдың сәйкес кезеңімен салыстырғанда тұмауға шалдыққандар саны 4 есеге өсіп, жедел респираторлы вирусты инфекция 26 пайызға төмендегенін айтып отыр. Сонымен қатар, баспасөз мәслихатында Қобда ауданындағы наубайханада мүшеқап қосып пісірілген нан туралы сөз қозғалды. Мұндай сорақылықты көре тұра тұтынушылар өндірушілерді кешіруге дайын болып шықты. Нанды сатып алғандар арыз жазудан бас тартқан. Мұндай жағдайда тұтынушылар бұқаралық ақпарат құралдарына жүгінгенімен, арнайы тексеру мекемелеріне баруға құлықсыз. Ал олардың құқын қорғаушы мекеме арыз түспей шағын және орта бизнесті, кез келген өндіріс орнын тексере алмайды. Баспасөз мәслихатында сонымен қатар 2015 жылы қызылша ауруының эпидемиологиялық жағдайы тұрақсыз болғандығы туралы айтылды. Жасөспірімдер арасында белең алған вирустан соң жаппай екпе жасалды. Осылайша 15-19 жас аралығындағы 45 мыңнан астам жас қызылшаға қарсы вакцина алды.Дәрігерлерді баласына мүлде екпе жасатпаған ата-аналардың шешімі алаңдатып отыр. Олардың айтуынша, ағзасы қорғалмамаған бала кез келген уақытта өзі дертке шалдығып қана қоймай, инфекция таратушы ретінде айналасындағы адамдарға қауіп төндіруі мүмкін. Түсіндіру жұмыстары жүргізілгенімен, Ақтөбе қаласы, Мұғалжар мен Темір аудандарында вакцинациядан бас тартқандар қатары артып отыр. Облыста туғалы екпе алмаған балалар мен вакцинадан өз еріктерімен бас тартқан жасөспірімдер саны 427-ге жетті.
