خالد يابوك احفظ وصاتي ابوصيك
وصيةٍ ماهي بـ أية وصيه
وصيةٍ تبقى عن الناس تغنيك
من شايبك ومقدمه لك هديه
لا تطرد المقفين لو هم بني اخيك
طرد المقفي في زمنّا خطيه
ولا تدرج العجفا مع الناس توديك
ولا تجادل العيّه يصيبك بغيّه
احذر من اللي بالخطا ما يخاطيك
هذا عدوك واحذر تصير زيه
واحذر تبين في حياتك خوافيك
تصير ضدك ساعةٍ فيه هيّه
واحذر تعاند في حلالك معاديك
المال مثل الحال صعبٍ مجيه
والصاحب الساحب حذاري يدهويك
ترى الولد يقرن بفعلة خويه
لا تخلف الهقوه برجلٍ هقى فيك
مردامنا اللي ناويٍ للرديه
منهو حكى عندك خلافك حكى فيك
اخذ الحذر يابوك صبح وعشيه
واقبل عذر من يعتذر لك ويرجيك
ما جاك إلا معترف بالخطيه
احشم بني عمك عسى الله يبقيك
وادمح خطاهم جعلها لك نديه
خل الكرم والمرجلة من مباديك
يرزقك من يحيي عظامٍ بليّه
مافات صفحه سجلت كل ماضيك
واغنم من المقبل خصالٍ سجيّه
وسهم المنايا كل يومٍ يباريك
قدم لها يابوك قبل المنيه
إما بكيت العود وإلا بيبكيك
سنة حياة وقسمةٍ فالبريه
هذي وصايا واحدٍ حيل يغليك
صاغ التجارب واعتبرها هديه
للشاعر / محمد خالد المشوح الملعبي
