Uşaqlıq illərimin isti nəfəsi bu evin divarlarına çöküb...
Mən uşaq olanda Alış baba poladlılar haqqında bunları demişdi: «Poladlılar dədə-babadan əkin-biçinlə, maldarlıqla məşğul olub, dağlarda yaşayıb. Ona görə də onlar Dəmirçilər kəndindən ayrılıb dağlara üz tutub. Poladlılar torpağa bağlı insanlar olduğu üçün cüt əkməyi, mal-heyvan saxlamağı daha məqsədəuyğun hesab edib. Babalarımız müxtəlif vaxtlarda dörd ailə ilə «Heydər evi», «Cabbar evi», «Yaqub uşağı» nəsilləriylə birlikdə Osmanlıdan Dəmirçilərə, «Ləzgi Məmmədli» nəsli isə həmin bölgədən Naxçıvana gəlib. «Ləzgi Məmmədli» nəsli bir müddət Ordubad rayonunun Vənənd kəndində yaşadıqdan sonra Dağbaşıya, oradan isə Dəmirçilərə köçüb. Daha sonra bu nəsillər Kosa dağın ətəklərinə Poladlı kəndinə gəlib çıxıb. Şor su bulağı ətrafında yerdən daxma qazıb yaşamağa başlayıblar...
Erməni-müsəlman davasına qədər (1905-1918) Poladlı kəndində 12 ev olub. Davada ermənilər kəndi iki dəfə yandırıb. Onlar qovulduqdan sonra camaat yenidən öz isti yurd-yuvasına qayıdıb, ev-eşik düzəldib. Sonralar kənddəki evlərin sayı 14-ə, daha sonra isə 22-yə çatıb...»
Qubadlı rayonunun Poladlı kəndi. Dağlıq ərazidədir. Ağa çayının yaxınlığında yerləşir. Kənd Şahsevənlərin Poladlı qolunun burada məskunlaşması nəticəsində yaranmışdır.
Kənddə «Heydər evi», «Cabbar evi», «Yaqub uşağı» və «Ləzgi Məmmədli» («Sadıq uşağı») nəsilləri məskən salmışdır.
Poladlı kəndi Qubadlı rayonundan bir neçə kilometr məsafədə dağlar qoynunda yerləşir. Kənd özündən müxtəlif uzaqlıqda olan Dəmirçilər, Dondarlı, Çərəli, Göyyal, Zor, Mehrili, Yuxarı Xocamsaxlı (Məzitli) və Aşağı Xocamsaxlı (Qalacıq) kəndlərinin ərazisi ilə sərhəddir. Poladlı kəndi bir tərəfdən Kosa dağ, Alzabəyin yal, digər tərəfdən isə Güney qaya (Qiblə) və Ala qaya adlanan sıldırım qayalarla əhatə olunmuşdur. Burada hər bir toponimin özünəməxsusluğu və yaranma səbəbi vardır. Belə toponimlər əsasən yerləşdiyi məkana, formaya və ya yer sahibinin adına uyğun olaraq adlandırılmışdır. Uzun illərdən bəri bu toponimlərin bəziləri öz deyiliş formasını dəyişmiş, bəziləri isə olduğu kimi qalmışdır...
Rasim Mədəd
"Ruhumun Vətəni" kitabından
(Çəkilişə görə dron operatoru Ayxan Kərimliyə təşəkkür edirəm)
