Lənkəranda ilk dəfə “Çay, çəltik və sitrus meyvələri” festivalı keçirildi. Azərbaycanın dövlət atributları və Lənkəranın simvolunu əks etdirən pavilyonlarda rayonda istehsal olunan sənaye və kənd təsərrüfatı məhsulları nümayiş etdirilir.
Lənkəranda möhtəşəm bayram abhavası yaşanır. Şəhərin mərkəzində Ulu öndər Heydər Əliyevin adını daşıyan xatirə parkında, geniş meydanda təşkil olunan festivalda 10-a yaxın pavilyon qurulub. Bu pavilyonlarda 50-yə yaxın şirkət tərəfindən sənaye və kənd təsərrüfatı məhsulları və yerli təamlar sərgilənir.
Taxıl, çəltik, tərəvəz, bostan bitkiləri, sitrus meyvəçilik, çayçılıq bir sözlə Lənkəran iqtisadiyyatın bütün aparıcı sahələrinin təmsil olunduğu Məhsul bayramında Azərbaycanın dövlət atributları və Lənkəranın simvolunu əks etdirən fotostendlərlə "Çayımızın adı var”, "Süfrələrin bəzəyi Lənkəranın düyüsü”, "Gözəlliyi damla-damla topladıq”, "Yeni Lənkəran tikmək üçün”, "Lənkəranın şirnisi – ağız dadımız”, "Cənnət görmək istəyən Lənkərana gəlsin” adlı pavilyonlarda rayonda istehsal olunan ərzaq, sənaye, kənd təsərrüfatı məhsulları, xalq sənətkarlığı nümunələri nümayiş etdirildi.
Bundan başqa, tədbir iştirakçıları ən bacarıqlı və təcrübəli aşpazların hazırladığı yüksək keyfiyyətli yerli sortlardan olan "Haşimi", "Sədri", "Campo" düyülərindən bişirilən 50 növdən çox plov, eyni zamanda Lənkəran mətbəxinin ləziz təamlarından olan "Ləvəngi"dən hazırlanan xörəklər və müxtəlif çeşidli kabablardan daddılar.
Bir saatlıq fasilədən sonra festival Respublikanın tanınmış incəsənət ustalarının ifasında bayram konserti ilə davam etdiriləcək. Ümumilikdə bu möhtəşəm tədbirdə 5 mindən çox insan iştirak edirdi. Festivala atəşfəşanlıqla yekun vurulacaq.
