Астана процесі сәтті аяқталды. Санаулы уақыттар бұрын екі күнге жалғасқан жиынның қорытындысы бойынша Ресей, Түркия және Иранның бірлескен мәлімдемесі жасалды.
Құжатта келіссөздердің келесі раундына қарулы оппозиция өкілдерінің қатысуға келісім бергені жазылған.
Демек Астана ұсынған мүмкіндікті қарсы тараптар пайдалана алды. Женевада 8 ақпан күні өтетін келіссөзде Сирия билігі мен оппозиясы алғаш рет бетпе-бет кездесетін болады. Бұл – елордадағы жиынның басты жеңісі.
Зайнұр Байжігіт, тілші
-Келіссөздер ауыр өтті. Оны мынадан-ақ аңғаруға болады. Кездесудің аяқталуы түскі 14:00-ге белгіленген еді. Астана процесінің нәтижесі бойынша қорытынды баспасөз мәслихаты өтуі тиіс болатын. Бірақ жабық есік жағдайындағы кездесулер 7 сағатқа созылып, кешкі 5-тен асқанда бір-ақ аяқталды. Ал бір сағат бұрын арнайы баспасөз мәслихаты ұйымдастырылды. Онда еліміздің Сыртқы істер министрі Қайрат Әбдірахманов Ресей, Түркия, және Иранның бірілескен мәлімдемесін оқып берді. Құжатта кепіл беруші мемлекеттер бейтарап алаң ұсынған үшін Президент Нұрсұлтан Назарбаевқа алғыс айтып, осы бағыттағы келіссөздерді жалғастырудың маңыздылығын атады.
