Cəlilabad rayonunda taxıl əkininə başlanılıb. Hazırda payız şumunu qaldıran əkinçilər paralel olaraq həm də taxıl əkirlər. Fermerlərin əzmkarlığı ilə yanaşı həm də hər təsərrüfat sahibinin şəxsi texnikaya sahib olması işləri daha da sürətləndirib. Şum bitməmiş taxıl sahələrinin artıq 30 faizi əkilib.
Prezident İlham Əliyev ölkə iqtisadiyyatının bütün sahələri kimi kənd təsərrüfatını da daim diqqətdə saxlayır. Respublikamıza lizinq yolu ilə gətirilən kənd təsərrüfatı texnikalarının fermerlərə güzəştli şərtlərlə verilməsi əkinçilərin işini rahatlaşdırmaqla yanaşı həm də sürətləndirib. Ölkə iqtisadiyyatının şaxələndirilməsi istiqamətində atılan bu addımlar eyni zamanda məhsulun maya dəyərinin də aşağı düşməsinə səbəb olub.
Cəlilabad Rayon Kənd Təsərrüfatı İdarəsinin Bitkiçilik Sektorunun müdiri Fizuli Əliyev: “Kütləvi olaraq əkin gedir. Fermerlərimizin əksəriyyətinin texnikaları var. Şumu özləri vururlar. Demək olar ki, bunlara ucuz başa gəlir.”
Lizinq yolu ilə texnika sahibi olan fermerlərdən biri də Sahib Əsədovdur. Təsərrüfat sahibi dövlətin dəstəyi nəticəsində əkin sahəsini genişləndirərək bu il 40 hektara çatdırıb. Payız şumunu vaxtında yekunlaşdıran fermer artıq 10 hektar sahədə səpin aparıb.
Fermer Sahib Əsədov: “10 hektarını səpmişəm dalını da səpirəm. Əkin də yaxşı gedir.”
Təsərrüfat sahibləri deyir ki, ötən il məsuldarlıq yüksək olmaqla yanaşı, qiymətlər də onların ürəyincə olub. Biçin zamanı fermerlər becərdikləri məhsulu bazara 25-30 qəpiyə çıxarıblar. Sahələrdə əsasən yerli iqlimə uyğunlaşdırılmış toxumlar əkilir. Ən çox isə "bərəkət" buğda sortu daha məhsuldar olduğundan fermerlər bu sorta daha çox üstünlük verirlər.
Fermer Sahib Əsədov: “Qane edir. Ötən il toxumu Kənd Təsərrüfatı İdarəsindən almışdım. Həmin o buğdadan bu il ikinciildir ki, toxum götürmüşəm bu ildə onu əkirəm. 2-3 ildə də hələ onu əkəcəm.”
Cəlilabad Rayon Kənd Təsərrüfatı İdarəsinin Bitkiçilik Sektorunun müdiri Fizuli Əliyev: “Cəlilabadda əksəriyyəti yerli iqlim şəraitinə uyğunlaşmış sortlarıdr. Burada toxumçuluq təsərrüfatları var. Fermərlər var ki, həmin fermerlər toxum istehsal edirlər. Toxumlar seleksiya üsulu ilə yetişdirilir və fermerlərə satılır.”
Rayon Kənd Təsərrüfatı idarəsindən ARB-yə bildirildi ki, taxıl əkini üçün fermerlərə 90 manat subsidiya verilir. Bundan başqa fermerlər əkin zamanı istifadə edilən gübrələri 70 faiz güzəştlə əldə edirlər. Cəlilabadda 65000 hektar sahədə taxıl səpini aparılır ki, bunun da 8000 hektarı artıq əkilib.
