Еліміздің солтүстігінде бюджеттің қыруар қаржысына салына бастаған әлеуметтік нысандардың құрылысы тоқтап тұр. Құны бірнеше миллиард теңгеге бағаланған жаңа аурухана, емхана, студенттерге арналған жатақхана мен қазақ театры сияқты ғимараттар былтыр қолданысқа берілуі тиіс еді. Бірақ бәрінің құрылыс жұмыстары орта жолдан тоқтап қалған. Ал нысандарды салуға жұмсалған бюджет ақшасының қайда кеткені белгісіз.
БІРЖАН ЖАЛҒАСБАЕВ, С.Мұқанов атындағы қазақ сазды-драма театрының директоры:
– Жалпы ішінің барлығын, сыртқы келбетін түгел күрделі жөндеуден өткізу керек. Расында да енді 21 ғасы үлкен зал керек. Үйренеріміз бар, көрсетеріміз бар. Сондықтан ары қарай шығармашылық жоспарымызды кеңейту үшін, үлкен халықаралық аренаға шығу үшін жаңа театр керек.
Ал былтыр пайдалануға берілуі тиіс мына университет жатақханасының қабырғалары да көтерілмеген. 2020 жылы басталған нысанның тек қаңқасы ғана тұр. Бюджеттен 800 млн теңге бөліп, бір жылдың ішінде пайдалануға береміз деген құрылыс нысанында тірі жан да көрінбейді. Ал университет студенттері жаңа жатақхана ғимаратына мұқтаж. Себебі ескі ғимараттардың көбінде қыста суық болғандықтан тұру мүмкін емес дейді. Тіпті, жатақханадағы орындар бәріне бірдей жете бермейді екен.
РАУШАНБЕК БЕЙСЕМБАЕВ, студент:
– Керек бізге жаңа жатақхана. Квартирада жүрген балалар көп. Олардың көбі ақылы оқитындар. Жатақханаға кірмей қалғандар квартирада тұрып жатыр амал жоқ. Оның қалталарың көтере ме? Жоқ әрине қымбат.
МАНАС ТҰРМАНОВ, студент:
– Қыстың күні суық болады бізге. Қазір біздің тұрып жатқан жатақхана суық қыстыгүні. Ағаш терезелерден суық үрлейді. Бөлмелер дені дұрыс жылынбайды. Жаңа жатақхана берсе жақсы болатын еді.
«Береке» шағын ауданында бой көтере бастаған емхананың құрылысы да бір жылға кешіктіріліп жатыр. Қазір құрылыс басында күзетші мен санаулы ғана жұмысшыны көруге болады. Медицина ғимаратын халық баяғыдан бері күтіп отырған. Өйткені бұл ауданда бірде бір емхана жоқ. Ал осы ғимараттарды салуға тапсырыс берген құрылыс басқармасының өкілдері бұған әлін білмей тендерлерге таласатын мердігерлерді кінәлайды. Себебі, жап-жақсы бастаған құрылыс жұмыстарын аяқтауға кейін күші де, қаржылық жағдайы да жетпей орта жолдан тастап кетіп жатыр дейді.
АБАЙ ЛЕСБЕКОВ, СҚО Құрылыс басқармасы басшысының орынбасары:
– Негізі проблема мердігерлердің өз жұмыстарын тиісті атқармауынан болып отыр. Содан келіп, пандемия басталды, құрылыс материалдары да қымбаттап кетті. Соның кесірінен әрқайсынан үш миллион теңге қаржы бөлуге тура келді.
Ал түрік инвесторлары тұрғыза бастаған заманауи көпсалалы аурухананың құрылысы қыста тоқтап қалған. Денсаулық сақтау министрілігінің мәліметінше, инвестордың жобалық құжаттары дұрыс болмағандықтан созылып кеткен.
Жергілікті билік бұл нысандардың бәрі де жыл соңына дейін пайдалануға беріледі дейді. Бірақ ғимараттардың қазіргі жағдайына қарағанда, халық үшін қажетті нысандарды жарты жылдың ішінде аяқтап үлгермейтін сияқты.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#бюджет #құрылыс #қажетті_нысандар
