ئەلقەی سێیەمی بەرنامەی چوارقۆڵی، دەربارەی هەڵبژاردنی داهاتووی پەرلەمانی کوردستان و هەروەها کاریگەری پەیوەندییەکانی پارتی و یەکێتی لەسەر ئەوە بووە.

سەرەتا زریان رۆژهەڵاتی، بەڕێوەبەری ناوەندی لێکۆڵینەوەی رووداو باسی لەوە کرد کە هەڵبژاردن بە گشتی لە رۆژهەڵاتی نێوەڕاست گۆڕانکاری خێرای دروستنەکردووە بەڵام لە ماوەی درێژخایەندا دەرئەنجامی وەک ناکۆکیی نوخبەی سیاسی و دەرکەوتنی ئۆپۆزسیۆنی لێکەوتۆتەوە.

هەڵبەت جەختی لەوەش کرد کە هەندێک کاریگەری سیاسیشی هەیە کە ناکرێ پشتگوێ بخرێن. باسی لە چوار هەڵبژاردنی گرنگ کرد کە لەم ماوەیەدا دەتوانن کاریکەری لەسەر بارودۆخی رۆژهەڵاتی نێوەڕاست دابنێن:«یەكیان ئەوەی کۆتاییەکانی ساڵی رابردووی ئیسرائیلە. گەڕانەوەی نەتانیاهۆ، لەسەر هاوسەنگییەكانی هێز لەم ناوچە بێ کاریکەر نابێت. هەلبژاردنەكەی مانگی 4ی توركیا، جا چی بەمانەوە یان بە رۆیشتنی ئەردۆغانیش کۆتایی بێت، خاڵێکی وەرچەرخانە.

حكومەتەکەی سوودانی بەڵێنیداوە هەڵبژاردنی ئەنجومەنی پارێزگاكان و پەرلەمان بكات. دیارنییە كەی ئەیكات، بەڵام هەرکاتێ کردی دۆخی وڵات ئەگۆڕێت. ئێرانیش مانگی 2ی2024 هەڵبژاردن ئەكات، ئەمەش دوای خۆپیشاندانەكانی ساڵی رابردودا، رووداوێکی ئاسایی نابێت.

هەڵبژاردنە چاوەڕوانکراوەكەی كوردستانیش گرنگە. چونکە ئەتوانێ كاریگەری لەسەر دۆخی نێوخۆیی زۆرێك لە حیزبەكان، چارەنووسی ئۆپۆزیسیۆنی و بەینی یەکێتی و پارتی و، پەیوەندییە دەرەكییەكانی هەولێریش دابنێت.»

پاشان سەرکەوت زەکی، ئەندامی مەکتەبی سیاسیی یەکێتیی نیشتمانی کوردستان، باسی کاریگەری کێشەی نێوان پارتی و یەکێتی لەسەر ئایندەی هەڵبژاردن کرد و گوتی" بابەتی هەڵبژاردن تەنیا پەیوەست نییە بە پارتی و یەکێتی، بەڵکو پێویستە ژینگەیەکی سیاسی لەبار هەبێت بۆ بەڕێوەچوونی هەڵبژاردن، بەداخەوە ئێستا ژینگەیەکی لەبار نییە بۆ بەڕێوەچوونی هەڵبژاردن".

سەبارەت بە کۆبوونەوەی پارتی و یەکێتی، سەرکەوت زەکی گوتی" رەنگە هەفتەی داهاتوو یەکێتی و پارتی کۆببنەوە.»

سەرکەوت زەکی روونیکردەوە، حیزبەکەی گلەیی لە کۆمیسیۆن و تۆماری دەنگدەران و یاسای هەڵبژاردن هەیە و گوتی" دەبێت ئەندامانی کۆمیسۆن تەواو سەربەخۆ بن، یەکێتی داوای هەموارکردنەوەی یاسای هەلبژاردن دەکات، هەموارکردنی ئەمجارەی یاسای هەڵبژاردنیش زۆر جیددیترن لە هەموارەکانی رابردوو. گرنگترینیان بابەتی کۆتاکان دەبێت. بۆ نموونە، بۆ نابێت تورکمانەکانی کفریش لە پەرلەمانی کوردستان کۆتایان هەبێت."

سەرکەوت زەکی ئاشکرایکرد، یەکێتی لە مانگی 11ی 2021 داوایکردووە یاسای هەڵبژاردن هەمواربکرێتەوە و گوتیشی:" هۆکاری بەڕێوەنەچوونی هەڵبژاردن لەکاتی خۆی، هەمواری یاساکە و لیستی دەنگدەران بوو. داوامانکردووە بەپێی داتای وەزارەتی پلاندانانی عێراق هەڵبژاردن بکرێت، واتە بەبێ پاکردنەوەی تۆماری دەنگدەران ناچینە پرۆسەی هەڵبژاردن".

کەمال رەئووف، رۆژنامەڤان، روونیکردەوە، هەرێمی کوردستان رابردوویەکی باشی لەگەڵ هەڵبژاردن دا نییە، گوتی"پێموایە ئەنجامدانی هەڵبژاردن باشترە لەوەی هەر نەکرێت" ئاشکرایکرد، لە دوایین هەڵبژاردندا پارتی و یەکێتی نیوەی دەنگی هەڵبژاردنی پێشووتریان کەمکردووە.

سەبارەت بە ئەنجامدانی هەڵبژاردنێکی پاک، کەمال رەئووف گوتی" تاوەکو هێزی چەکدار لە دەستی حیزبدا بێت هەڵبژاردن ناتوانێت گۆڕانکاری دروست بکات، هەروەها بەم تۆمارەی دەنگدەرانەی ئێستا هەڵبژاردنێکی پاک ناکرێت، ئێستا دەزگا هەیە تایبەتە بە ساختەکردنی دەنگی مردووەکان لە هەڵبژاردندا، جگە لەمەش بەشێک کوردی رۆژئاوا و باکوور و رۆژهەڵات لە هەڵبژاردنەکانی باشوور دەنگ دەدەن، بەداخەوە هەڵبژاردنێک شەرعییەت بداتەوە بەم دۆخەی ئێستا خراپە بکرێت، چونکە ئەم دۆخە وادەکات پارتی و یەکێتیی زیاتر بێ منەت بن".

بەڕێوەبەری ناوەندی لێکۆڵینەوەی رووداو گوتی" دیوێکی دیکەی هەڵبژاردنیش ئەوەیە کە گۆڕانکارییەکی درێژخایەنی دروستکردووە. وەک دەرکەوتنی ئۆپۆزسیۆن. دەنگەکانی پارتی و یەکێتیی لە 1992ەوە پلە بەپلە لە هەڵبژاردنەکان دەنگەکانیان کەمی کردووە ئەمەش دەریدەخات کە هەموو ئەنجامەکە بە گوێرەی ئەوان نەبووە".

لای خۆیەوە عەدنان عوسمان، شرۆڤەکاری سیاسی، رایگەیاند، دەبووایە هەڵبژاردن لەکاتی خۆیدا بکرێت، بەڵام وەک هەمیسە ناکرێت و گوتی" پەرلەمانی کوردستان تاکە پەرلەمانی جیهانە بە دلێ خۆی خولەکانی خۆی درێژدەکاتەوە، هەرچەندە هەموولایەک دەیانەوێ هەڵبژاردنێکی پاک لە هەرێمی کوردستان ئەنجام بدرێت، کە قورسە، هەرچەندە ئەگەر کۆمیسیۆن بیەوێت دەتوانێت هەڵبژاردنێکی پاک ئەنجام بدات، بۆیە دەبێت ئەو کۆمیسیۆنە حیزبییەی ئێستای هەڵبژاردن کۆتایی پێبهێنرێت، لەلایەکی دیکەش تاوەکو هێزی چەکدار لە دەستی حزب بێت هەڵبژاردنی پاک ناکرێت".

سەبارەت بە کۆمیسیۆنی هەڵبژاردن، عەدنان عوسمان گوتی" حیزبەکان بۆیان نییە نوێنەریان لە کۆمیسیۆنی هەڵبژاردندا هەبێت، دەبێت کۆمیسیۆن کاتی بەڕێوەچوونی هەڵبژاردن دیاریبکات نەک حیزب."

عەدنان عوسمان هیوای خواست، ئۆپۆزسیۆنێکی بەهێز لە هەرێمی کوردستان دروست بێت و هەروەها دەرفەت بە هێز و کەسایەتییەکان بدرێت لە هەڵبژاردن بێنە پێشەوە، چونکە ئێستا بەرەیەکی گەورەی بایکۆت هەیە لە کوردستان.

свернуть