Мемлекет басшысының бастамасымен сәуір айында бастау алған «Таза Қазақстан» экологиялық акциясына 5 млн 830 мыңнан астам адам атсалысты. Сенбілік аясында 1,1 млн тонна қоқыс жиналып, 1,6 млн ағаш егілді. Қоршаған ортаны күтіп ұстауға бағытталған бастамаға 90 мыңнан астам ерікті қатысты. Одан бөлек мемлекеттік қызметкерлер, жеке ұйымдардың өкілдері мен қала тұрғындары да білек сыбана кіріскен. Сондай-ақ, акция аясында заңсыз қоқыс үйінділерін анықтау бойынша рейдтер жүргізілді. Соның арқасында көптеген полигон жабылды. Бұдан бөлек, 482 автокөлік тексеріліп, экологиялық стандарттарды бұзудың 105 фактісі анықталды. 96 жүргізушіге айыппұл салынды. Қазір экологиялық проблемаларды хабарлауға мүмкіндік беретін арнайы чат-бот жұмыс істеп тұр. Жыл ішінде цифрлық платформаға 7900-ден астам өтінім түскен. Олардың 7 мыңнан астамы орындалды. Азаматтар чат-ботқа аумақтарды тазалап, көшелерді абаттандыру керек деп өтінім қалдырған.
