Тағдырдың жазуымен Ақмешіт атырабына кіндігі байланған отандастар мейрамды жақсы жоралғылармен көмкерді. Бірі тұсау кесу тойын жасаса, енді бірі ауылдастарын наурыз көжеге шақырып, құрметтеді.
Сыр өңіріндегі өзге ұлт өкілдері көп шоғырланған мекеннің бірі – ІІІ Интернационал ауылы. Депортация дүрбелеңінен кейін Дямуршаевтар отбасы да осы жерде тамырын тереңге жайды. Олардың ұлты түрік болғанымен, қазақтың салт-дәстүріне құрметі ерек.
Салтанат Дямуршаева, ІІІ Интернационал ауылының тұрғыны:
-Туған жерім – Қазақстаным. Қазақстанда болғаныма ризамын. Қазақ ұлты болсын, басқа ұлт болсын, бәріміз бір үйдің баласындай татумыз.
Жалағаштағы шешен ұлтының өкілі Махмут Хамиевтың да шаңырағында шат-шадыман мереке. Бұл үйде ауылдастарға арнап ақ дастархан жайылып, наурыз көже әзірленді. Тегі басқа болғанымен, тілегі бір ағайын кең пейіл қазақ халқына деген шынайы разылығын осылай білдірді.
Махмут Хамиев, Жалағаш кентінің тұрғыны:
-Біздің әке-шешеміз жер аударып келгенде осы жақтың халқы қатты көмектескен. Соның бәрін бізге айтатын. Сол кезде көп адамдар өлімнен қалған.
Нұрлан Жақыпбеков, тілші
-Әдет-ғұрып, салт-дәстүр – ұлттың айнасы. Өзге ұлт өкілдерінің қазақтың тілімен бірге, ұлттық құндылықтарын да ұлықтай білгені туған жерге, елге деген құрметі болса керек. «Біздің тілегіміз – еліміздің бірілігі мен берекесі маңгілікке ұласса», – дейді отандастар.
Авторлары: Нұрлан Жақыпбеков, Әлхайдар Тұрлыханов
