Атырау облысында индустриалды инновациялық даму бағдарламасы аясында ондаған жаңа жоба жүзеге асырылып жатыр. Оптикалық-талшықты кабельдер шығаратын зауыт солардың қатарында. Жұмысын да бастап кетті. Толық жаңа технологияларға негізделген өндіріс орталығында жылына 11 мың шақырым кабель дайындалады. Жаңа кәсіпорын қазірдің өзінде 3 млрд теңгеге тапсырыс алып үлгерген.
Андрей Гиенко бүгін ғана іске қосылған зауытта жұмыс істейтін 50 маманның бірі. Осыған дейін біраз уақыт жұмыссыздықтың зардабын тартқан азаматтың қазір ертеңгі күнге деген сенімі арта түскен.
Андрей Гиенко, зауыт операторы
-Маған өзімнің осы зауытта атқаратын міндетім ұнайды. Қызықты әрі өте ыңғайлы жұмыс. Тұрақты қызмет болғандықтан жалақыны уақытылы алатыныма сенімдімін.
Ниегізгі шикізат – мыс. Кәсіпорын биыл жоспар бойынша 5 мың шақырым кабель шығаратын болады. Ал келесі жарты жылдықтан бастап 3 ауысымды еңбек шарты бойынша өндірісі көлемі 11 мың шақырымға дейін артады.
Қолға алынған жоба жақын шетелдерден тапсырыстар қабылдап жатыр. Зауыт құрылтайшылары өндіріске қажет қондырғыларды сатып алу үшін жылына 14 пайыздық өсіммен 483 млн теңге несие алған. «Бизнестің жол картасы» бағдарламасы аясында енді оның 7 пайызын ғана төледі. Қалғанын «Даму» қоры өндіріп береді. Бұл кәсіпкерлер үшін үлкен көмек болып отыр.
Ерсайын Дүйсемәлиев, телекоммуникациялық компания директоры
-Бұл өндірістің артықшылығы сол өнімге сұраныс жоғары және жаңа технология арқылы жасалады. Сондықтан біз қазірдің өзінде өнімге тапсырыс беріп қойдық.
Қазір аймақта жалпы құны 1,5 трлн теңге болатын 30-ға жуық серпінді жобалар жүзеге асырылуда. Солардың арасында жыл аяғына дейін дәрі-дәрмек өндіру зауыты мен жүн өңдеу және көкөніс консервілеу кәсіпорындары іске қосылмақ.
