Ermənistanda antisemitizm əhval-ruhiyyəsi yenidən baş qaldırıb. Hələ aprel döyüşləri zamanı erməni kütləvi informasiya vasitələri İsraillə Azərbaycan arasındakı hərbi əməkdaşlıqdan narahatlıqla məlumat yayırdılar. Mövzu Ermənistanda bu gün də aktualdır. Erməni tərəfi aprel döyüşlərində məğlubiyyətə görə İsraili ittiham edir.
İsraillə Azərbaycan arasında hərbi əməkdaşlıq 25 ildir yüksək inkişaf tempi ilə davam edir. Azərbaycan İsraildən bir çox növ silah-sursat alır. Bu isə Ermənistanı narahat edir. Rəsmi Yerevan İsraili Azərbaycanı silahlandırmaqda ittiham edir.
İsrailli ekspert Arye Qut CBC-yə bildirib ki, Azərbaycan və İsrail tərəfdaşlarını özləri seçirlər: “Hərbi sahədə əməkdaşlıq da bu seçimin bir hissəsidir. Ermənistan Rusiyadan silah almır, çünki Rusiya Ermənistana silah-sursatı hədiyyə olaraq verir və bu silahlardan Azərbaycana qarşı istifadə edilir. Buna baxmayaraq Azərbaycan Rusiyaya qarşı heç bir sərt bəyanatla çıxış etmir. Rəsmi Bakı başa düşür ki, ölkələr arasında bir çox sahələrdə olduğu hərbi sahədə də ortaq maraqlar ola bilər”.
20 ildən çoxdur Azərbaycan torpaqlarını işğal altında saxlayan Ermənistan aprel hadisələri zamanı qoşunların təmas xəttində böyük təxribat törətməyə cəhd göstərib və layiqli cavabını alıb. Döyüşlərdə xeyli sayda itki verən erməni tərəfi dərhal məğlubiyyətinə görə günahkarlar axtarmağa başlayıb. İttiham edilən ölkələr arasında Rusiya, Belarus və Qazaxıstan, hətta Kollektiv Təhlükəsizlik Müqaviləsi Təşkilatı da olub. Daha bir maraqlı ittiham isə İsrailin ünvanına səslənib. Ermənistan İsraili Azərbaycana pilotsuz uçan aparatların satılmasına görə ittiham edir.
İsrailli ekspert Avraam Şmuleviç bildirib ki, İsrail Azərbaycana müasir silah növlərini satır: “Azərbaycan suveren dövlətdir və başqa ölkələrdən fərqli olaraq heç kəsin torpağını əlindən almayıb. İsrail də bütün digər ölkələr kimi Azərbaycana silah sata bilər. İsrail Azərbaycanı dost və tərəfdaş ölkə kimi görür”.
Azərbaycanlı ekspertlər də bildirirlər ki, İsraillə Azərbaycan arasında mövcud olan hərbi əməkdaşlıq strateji əhəmiyyətə malikdir. Bu əməkdaşlıq torpaqları işğal altında olan Azərbaycanın müdafiə potensialının gücləndirilməsinə hesablanıb.
Politoloq Sahil İsgəndərovun sözlərinə görə, İsraillə Azərbaycanı bir çox sahələrdə ciddi əlaqələr birləşdirir: “İsrailin hərbi sahədə yüksək texnologiyalara sahib olması, silah imkanları olması Azərbaycan üçün İsraili maraqlı edir. O cümlədən, necə ki, Azərbaycan üçün İsraili maraqlı edir. Ermənistanda həmişə ən yüksək səviyyədə, rəsmi dairələrdə yəhudilərə və İsrailə qarşı qıcıq var”.
Rəsmi Bakı dəfələrlə mövcud status-kvoyla razılaşmayacağını və Ermənistanın Azərbaycana qarşı atacağı istənilən təxribata layiqli cavab verəcəyini bəyan edib. Bunun üçün Azərbaycanın hərbi qüdrətini gücləndirir. Bu məqsədlə həm İsraillə, həm də Rusiya ilə yüksək səviyyəli əməkdaşlıq həyata keçirilir.
