لە تەواوی ناوچەوکانی باشووری کوردستان ئاهەنگی نەورۆز بەڕێوەچوو، بیانییەکانی باشووری کوردستان بەجل و بەرگی کوردییەوە لە گەڵ هاونیشتمانیانی کوردستان بەشداری ئاهەنگی جەژنی نەورۆز دەکەن، ئەوان دڵخۆشی خۆیان بە بەشداریکردنیان لە ئاهەنگەکە دەردەبڕن.
رایان لەوەتەی لە باشووری کوردستانە، یەکەم جارییەتی خۆی بۆ نەورۆز ئامادە دەکات، چونکە نەورۆزەکانی دووساڵی رابردوو لە بەرەکانی جەنگدا لەگەڵ پێشمەرگە شەڕی داعشی دەکرد.
رایان ئاڵێری، پێشمەرگەی خۆبەخشی ئەمریکی بە تۆڕی میدیایی رووداوی راگەیاند "بەشێوەیەک خۆمان بۆ نەورۆز ئامادەکردووە، دەمەوێت هەموو ئەو هاوڕێ کوردانە ببینم کە دەیان ناسم. لە بەرنامەمان دایە بۆ ئاگری نەورۆز بچینە ئاکرێ و هەر لەوێوە کەیف و سەفا بگێڕین و هەر لەوێوە بچینە سەیرانگەکان. بەڵام وابزانم پێویستم بە ئوتوکردنی جلە کوردییەکانمە".
رایان تاکە بیانی نییە خۆی بۆ نەورۆز ئامادەکردووە، رۆژنامەنووسێکی هۆڵەندی دوو رۆژە جلێکی کوردی بۆ نەورۆز کڕیوە، بە نێو بازاڕەکانی هەولێردا دەڕوات و خەڵک بە ئەستەم دەزانێت کوردە یا بیانی.
ڤلادمیر بەراوردی، بۆ تۆڕی میدیایی رووداو دەڵێت "لە هۆڵەندا ئاهەنگی وەکو نەورۆزمان نییە. کریسمس هەیە، بەڵام تەنیا لەماڵەوە نان دەخۆین و هەر ئەوەندەیە. وەکو کورد لە دەرەوە ئاهەنگ ناگێڕین. جیاوازییەکە ئەوەیە کوردانی ئەوروپا لە ژوورەکان یادی نەورۆز دەکەنەوە، بەڵام لە کوردستان هەموو خەڵک دەچنە دەشت و کێوەکان."
ڤلادمیر 10 ساڵ زیاترە سەردانی هەرێمی کوردستان دەکات، ئەو رۆژنامەنووسە بە جلی کوردی و بە قسە کوردییەکانی، بەشێک لە دووکاندارەکانی شاری هەولێر دەهێنێتە پێکەنین.
ئەمساڵ لە نەورۆزدا خەڵکی وڵاتانی ئەندام لە هاوپەیمانییەتی نێودەوڵەتی و کوردانی باشووری کوردستان دەیانەوێت دەستە ماندووەکەیان لەسەر سکی تێربێت، چونکە زیاتر لە دووساڵ بوو هەردوولا سەرقاڵی شەڕی دژی داعش بوون.
داڕشتنەوە: راوچی حەسەن
[ Ссылка ]
