Павлодар облысында айтпай келген дүлей дауыл жолда кездескеннің бәрін жайпап кетті. Өңірде ондаған мемлекеттік мекеме мен тұрғын үйлер шатырсыз, жылусыз, жарықсыз қалды. Зардап шеккендер жоқ. Қазір алапат шығын көлемі есептеліп жатыр. Ал Қостанайда боран тұрып, қалың қар жауды. Кесірінен көлік апаты көбейді.
Қостанайда болған дауыл көшелердегі билбордтарды сындырып, ғимараттардың шатырын ұшырды. Тіпті жерге бекітілген бағдаршамдар құлап, апатты жағдай туындады. Бұл аздай қатты боран тұрып, кесірінен жолдар көктайғаққа айналған.
Сұрапыл жел бірнеше шағын аудандардың көп қабатты үйлерін электр жарығынсыз, ал 14 жер үйлерді газ құбырынсыз қалдырды.
Ауа-райы қолайсыздығынан үлкен жол көлік апаттарына да әкелді. Автобус және ЗИЛ автокөлігі соқтығысқан, оқыс оқиға болды. Сондай-ақ, боранның арты қарға ұласып, аяз тұрған. Алайда ауа-райын бақылаушылардың ақпараты бойынша, бұл күн райы ұзаққа бармайды. Осы аптадан-ақ қостанайлықтар көктемнің жылуымен қайта қауышады.
Георгий Резинов те табиғат апатынан зардап шеккен көп тұрғынның бірі. Қатты желден дүкен маңында тұрған көлігіне шатыр құлап, темір тұлпар зақымданыпты.
Құлаған ағаштар, жыртылған баннерлер мен әр жерде шашылып жатқан шатырлар. Бұл да Павлодар облысында болған жойқын желден келген залал. Әзірге табиғат апатынан келген шығын бірнеше миллион теңге деп есептелуде. Қираған ғимараттардың қатарында ауылдық әкімдік, мектептер мен аудандық аурухана бар. Ұшқан шатырдың жалпы көлемі 5500 шаршы метр. Тұрғын үйлер де қатты дауылға төтеп бере алмады.
Ауа-райын болжаушы мамандар, Қазақстандағы құбылмалы күн-райы солтүстіктен келген циклонға байланысты дейді. Ал әзірге 30 сәуірде ауа температурасы 20 градуска дейін көтеріледі деп болжалуда.
