Енді несие тарихы нашар азаматтар, «қара тізімге» кіргені қарамастан, қайта банкке барып қарыз рәсімдей алады. Кредитті дер кезінде жаба алмағаныңыз үшін ақталып, өтініш жазып, құжат тапсырмайсыз. Бастысы, несие жапқаннан кейін, соңғы бір жыл уақыт ішінде өзге де проблемалы кредитіңіз болмауы керек. Кейбір экономистер екі күннен кейін іске қосылатын бұл механизм «халықты уақытша алдап қою үшін» жасалып отыр дейді.
Үш банктен несие алған Есмағұл Сейітқалиұлы соңғы екі жыл кредитін төлеп жүрген жоқ. Өйткені, жұбайының да, өзінің де денсаулығы сыр беріп, тұрақты жұмысынан айырылып қалған. Қазір құрылыста заңды түрде жұмыс істеп, нәпақасын тауып жүрген азамат, қарызымның барлығын бір банк арқылы қайта қаржыландыра алмай жүрмін дейді.
ЕСМАҒҰЛ ЖАНЕСІМОВ, Алматы қаласының тұрғыны:
– Несие берсе алып, жауып тастар едім мынаның бәрін. Сосын бір банкіге төлеп отырайын деп ем. Хоть біреуіне.
Есмағұл Жанесімов банктер мені «қара тізімде» тұрсың деп кері қайтарады дейді. Енді мұндай азаматтардың қайта несие рәсімдеуі үшін қайткен күнде де кредитін жауып, тура бір жыл ішінде банкте өзге де проблемалы берешегі болмауы керек. Сол кезде ғана бірінші кредиттік бюро борышкердің несие тарихы «оңалтылды» яғни, қалпына келтірілді деген мәртебені базаға енгізеді. Бұл статус бөліп төлеуге келіскен «қара тізімдегілерге де» беріледі дейді мамандар.
ЕРЛАН СЕЙІЛОВ, ҚР қаржы нарығын реттеу және дамыту агенттігінің департамент директорының орынбасары:
– Егер қарыз алушының берешегі толық емес, ішінара өтелген болса, банктер бұл қарыз алушымен ыңғайлы кестесімен бірге оңалту жоспарын жасайды. Соған сәйкес қарыз алушының оңалту жоспарын орындағаны және соңғы 12 айда басқа мерізімі өткен берешегі болмаған жағдайда «оңалтылды» деген мәртебені алады.
Экономист Меруерт Махмұтова, қарызға белшеден батқан бұқараны бұл жұбатудың ең тиімді тәсілі дейді. Бір жағынан осы механизм арқылы борышкерлерден банктер қаражат жинап, айналымын арттырғысы келетінін айтады. Бірақ, ол ас-ауқаттың өзін банк картасы арқылы бөліп төлеп жүрген жұрттың жаппай несиесін қайтаратына күмәнмен қарайды.
МЕРУЕРТ МАХМҰТОВА, экономист:
– Азаматтар әбден қарызға батып төлей алмай жатқанда, ол көшеге шығады. Сондықтан билік ондай бір шешімді амалсыздан қабылдап отыр. Банктердің саясаты не де болса өзіміздің пайдамызды ұлғайту дегендей.
«Оңалтылды» деген мәртебе банк алдындағы қарызын бұған дейін өтеп қойған, бірақ «қара тізімде» тұрған азаматтарға да тікелей қатысты. Енді олар 12 ай бойы проблемалы несиеге ұрынбаса, қайта кредит рәсімдей берсе болады. Айта кетейік, бұл мүмкіндік тек қана «тұтынушылық несие» алғандарға беріледі екен.
.
.
.
.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#несие #мобильді_банкинг
