20 Yanvar faciəsi qurbanlarının əziz xatirəsi Astara rayonunda anılıb. Böyük izdihamın yaşandığı anım mərasimində əvvəlcə Astara rayon İcra Hakimiyyətinin başçısı Qəzənfər Ağayev rayonun mərkəzində yerləşən Şəhidlər Xiyabanını ziyarət edərək, gül dəstələri düzüb. Sonra ümumrayon ziyarəti başlanıb. Hüquq-mühafizə orqanlarının, idarə, müəssisə və təşkilatların rəhbərləri, habelə ictimaiyyətin nümayəndələri Şəhidlər Xiyabanını ziyarət edib, tər gül dəstələri düzməklə Azərbaycanın azadlığı uğrunda canından keçmiş vətən övladlarının xatirəsinə ehtiramlarını bildiriblər. Ümumrayon ziyarəti günorta saatlarına qədər davam edib. Astara rayonunda 20 Yanvar faciəsini əks etdirən həm foto, həm də ümumtəhsil məktəblərinin şagirdlərinin əl işlərindən ibarət sərgi də təşkil edilib. Bu sərgi vasitəsi ilə o gecənin dəhşətləri bir daha rayon sakinlərinin diqqətinə çatdırılıb. Sonra Yeni Azərbaycan Partyasının inzibati binasında astaralı şəhidlərdən bəhs edən və müəllifi Mərasim Hacızadə olan “Əbədiyyət yolçuları” kitabının təqdimatı olub. Qeyd edək ki, Astara rayonunda iki 20 Yanvar şəhidi var, ümumi şəhidlərin sayı isə 84 nəfərdir. Rayonun son şəhidi bir neçə gün bundan əvvəl cəbhə xəttində düşmən təxribatının qarşısını alarkən şəhid olan Fikrət Nuşirəvan oğlu Bəşirovdur.
