هەردوو بەرەی عەبادی و مالیكی ناچار دەبن بۆ دروستكردنی حكومەت دەنگی كورد بەدەستبهێنن
كورد دەتوانێت جارێكی تر بگەڕێتەوە گۆڕەپانەكە بەوەی دواین بڕیاری خۆی بدات
یەكلاكردنەوەی گەورەترین كوتلەی پەرلەمانی عێراق و دروستكردنی حكومەتی نوێ چەندین سیناریۆی لە پێشە، كە لەهەمویاندا كورد دەتوانێت رۆڵی یەكلاكەرەوە بگێڕێت و ماف و داخوازییەكانی خۆی بچەسپێنێت، ئەمە ئەگەر ئەو هێزە كوردییانەی، كە بانگەشەی نوێنەرایەتی كورد دەكەن خەمی خەڵك بخەنە پێش خەمی دەستكەوتەكانی خۆیان، بەبڕوای چاودێرانیش پرۆسەی پێكهێنانی حكومەت پرۆسەیەكی ئاڵۆز دەبێت و بەم زوانە چارەسەر نابێت.
هەرچەندە ئەنجومەنی نوێنەرانی عێراق رۆژی 3ی ئەم مانگە یەكەم دانیشتنی خۆی ئەنجامدا، بەڵام هەروەك چاوەڕوان دەكرا لەو دانیشتنەدا كێشەی گەورەترین فراكسیۆنی پەرلەمانی لەنێوان هەردو بەرەی (عەبادی) و (مالیكی)دا چارەسەرنەكراو دۆسیەكەی رەوانەی دادگای فیدراڵی كرا، بۆ بڕیاردان لەوەی ئایا كام بەرەیە توانیویەتی گەورەترین فراكسیۆن دروست بكات، تاوەكو لەلایەن سەرككۆمارەوە تەكلیفی دروستكردنی كابینەكەی لێبكرێت.
لەو نێوەندەشدا كورد، كە دابەشی دوو بەرە بووە، بەرەی پارتی و یەكێتی و بەرەی چوار لایەنەكە، تاوەكو ئێستا بەفەرمی خۆیان یەكلاینەكردۆتەوەو نەڕۆشتونەتە لای هیچ كام بەرە شیعەكانەوە، كە ئەمەش وەهایكردوە نە هەڵوێستی بەرە شیعەكان بەرامبەر داواو خواستی لایەنە كوردییەكان دیاربێت، نە هەڵوێستی ئەو لایەنانەش بەرامبەر بەرە شیعەكان ئاشكراو روون بێت.
لەلایەكی ترەوە هەر بە تەنها بە دروستكردنی گەورەترین كوتلەی پەرلەمانی كێشەكان كۆتایی نایەت و حكومەت دروست ناكرێت، بەڵكو دوای راسپاردنی گەورەترین كوتلە پێویستە ئەو كوتلەیە بتوانێت حكومەت دروست بكات و لە پەرلەمان دەنگی پێویست بەدەستبهێنێت و هەڵوێستی لایەنە كوردییەكانیش روونتردەبێتەوە، لەو چوارچێوەیەشدا 3 سیناریۆ لەئارادایە، كە بەمجۆرەن:
سیناریۆكانی پێكهێنانی حكومەت
1/ ئەگەر دادگای فیدراڵی كوتلەكەی عەبادی وەك گەورەترین كوتلە وەسفكرد، ئەوا ئەو كوتلەیە پێویستە لەگەڵ لایەنە كوردیەكان رێكبكەوێت و زۆرترین داواكارییەكانیان جێبەجێبكات تا كورد رازی بێت لە گەڵیدا حكومەت دروست بكات، ئەگەر نا ئەوا كوتلەكە ناتوانێت حكومەت پێكبهێنێت و تەكلیف لە كوتلەیەكی تر دەكرێت حكومەت دروست بكات.
2/ ئەگەر دادگای فیدراڵی كوتلەكەی مالیكی وەك گەورەترین كوتلە وەسفكرد، ئەوا ئەو كوتلەیەش دێتەوە بۆ لای كورد بۆ ئەوەی حكومەت دروست بكات، ئەگەر نا ئەوا ئەو كوتلەیەش شكست دەهێنێت.
3/دواین سیناریۆش پەنابردنی گەورەترین كوتلەیە بۆ چەند كوتلەیەكی بچوكی سونەو شیعەو كورد بۆ ئەوەی حكومەتی یەكێتی نیشتیمانی دروست بكات، كە ئەمەش هەمان حكومەتی هاوشێوەی جاران و پشك پشكێنە دەبێت.
بە بڕوای بەشێك لەچاودێرانی سیاسی دروستكردنی حكومەتی نوێی عێراق پرۆسەیەكی ئاسان نابێت و هێشتا چەندین گرفت و ئەگەری قورس لەبەردەم پرۆسەكەدا ماوە، ئەمە جگە لەرۆڵی ململانێی هەرێمی و نێودەوڵەتیەكان لە یەكلاكردنەوەی پرسەكەدا.
هەر بەبڕوای ئەو چاودێرانە ئەگەر پارتی ویەكێتی جارێكی تر پرسی كوردو ماف وداخوازییەكانی لە بەرامبەر هەندێ پۆست و دەستكەوتی شەخسیدا بەهەدەر نەدەن، ئەوا ئەمجارەش دەتوانرێت كورد بهێنرێتەوە گۆڕەپانەكەو بەهۆی رۆڵە یەكلایكەرەكەیەوە كارتەكانی خۆی بخاتە روو و داواكانی جێبەجێبكات، بەڵام ئایا كورد سودی لەمێژوو وەرگرتووە؟ ئەمە پرسیارە قورسەكەیە.
→ website: [ Ссылка ]
→ Facebook: [ Ссылка ]
→ youtube: [ Ссылка ]
→ [ Ссылка ]
→ Instagram: [ Ссылка ]?
hl=enhttps://twitter.com/knncchannel
