Алматыдағы «Бұқар жырау» тұрғын үй кешенінде күзетшіні жаралап, кейіннен өзінің пәтеріне тығылып, 30 рет оқ жаудырған Руслан Исаев әбден қаруланыпты. Пәтер иелері кооперативіндегілер Исаев сенбі күнгі атысқа алдын-ала дайындалды деп ойлайды. Ал тұрғындар, дауға ПИК-тегілердің өздері жазықты деп санайды. Ресейдің Челябинск облысынан Қазақстанға бауырын жерлеуге келе жатқан оның туған ағасы, інісінің өліміне «арнайы жасақ» кінәлі деп отыр.
ӘЙГЕРІМ ЕРДӘУЛЕТ, тілші:
– Біз атыс болған «Бұқар жырау» тұрғын үй кешенінің 17-ші қабатына көтерілдік. Кірген бетте бұл жерде айнада, қабырғада, төбеде де оқ іздері анық бар. Ал Руслан Исаевтың өзінің тұрып келген пәтерінің есігі әу баста ағаштан болған екен. Бұл темір есікті атыстан кейін қойды дейді пәтер иелері кооперативі. Ал ағаштан жасалған есіктің тура мына жерінде дөп-дөңгелек ойық тесік болған.
ВАЛЕНТИНА ЛОБОРЕВА, тұрғын үй кешенінің консерьжі:
– Оның күртешесінің алдында пышақтар да болды. Сол күні әскери киіммен жүрді. Атысқа алдын-ала дайындалған сияқты.
Руслан Исаев жиһаз жасаумен, пәтерлерін жалға берумен айналысқан. Үш ай бойы үйдің кіреберісінде тұрған ескі дивандарды сыртқа шығарып тастаған күзетшіден ПИК-тің бұл әрекетін түсіндіруді талап етуге барған дейді тұрғындар.
Күзетшіден жауап ала алмағандықтан, ПИК-тің басшысын шақырмақ болып, күзетшінің аяғынан атып, рацияны тартып алған.
ГҮЛБАҒИРА КЕРТАЕВА, тұрғын:
– Бұрынан дөрекі мінезбен, ауыр мінезбен байқалатын. Бірнеше жыл бұрын отбасы да мінезін көтере алмай ажырасып кетіп қалған екен.
Ол плакаттарды бір апта бұрын іле бастапты. Көршілер чатында да дауласа берген. Ал Руслан Исаевтың Челябинкс облыснан Қазақстанға келе жатқан ағасы, інісінің өліміне арнайы жасақты кінәлайды.
САИД ИСАЕВ, Руслан Исаевтың бауыры:
– Қарама-қарсы терезеден арнайы жасақтың сарбаздары оған да оқ жаудырған. Ол теңселіп барып, құлап түседі. Егер, өзіне-өзі қол жұмсағысы келсе, қолындағы қаруымен бірге секіріп несі бар?
Саид Исаев, бауырының психикалық ауытқуы болуы мүмкін екенін жоққа шығармайды. Өйткені, 2017 жылы Махачкала қаласында төсекке таңылып жатқан науқас әкесін ешкімге ескертпестен Избербаш шаһарына алып кеткен екен.
Исаевтың 3 қызы мен бір ұлы шешелерімен бірге 5 жылдан бері Шешенстанға көшіп кетіпті. Әу баста, Мәскеуде тұрған ол, Алматыға 12 жыл бұрын қоныс аударған.
Ал ұлттық қауіпсіздік қызметінің ардагері алты сағат бойы қару кезенген азаматпен ортақ мәмілеге келе алмаған полицияның бұл әрекеті олардың мүлдем дайындығы жоқ екенін білдіреді дейді.
ЖАНДІЛДӘ ЖАҚЫПОВ, ұлттық қауіпсіздік қызметінің ардагері:
– Мен Абу Сұлтанмын. Маған еріңдер. Сатана биліктен кетіңдер. Менің артыма еріңдер деген сықылды. Өзінің террорист екенін де сол плакатымен көрсетіп отыр. Ал жарған жағдайда не болады? Сонда барлық тұрғын өлу керек пе сонда?
Руслан Исаевтың ағасы болса, Шешенстанда оның ешқандай террорлық әрекетке қатысы болмағанын айтады. Дәрігерлер тізесіне оқ тиген күзетшінің жағдайы бірқалыпты дейді.

Әйгерім Ердәулет Ринат Әбілқайыров






Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31

#Алматыдағы_атыс #Бұқар жырау #РусланИсаев

свернуть