NY FIJOROANA HO VAVOLOMBELON'I TOMASY
Vakio ny Jao. 20:19-31. Inona ny lesona mikasika ny finoana sy ny fisalasalana azontsika sintonina avy amin'ny tantaran'i Tômasy? Inona ny fahadisoana lehibe nataony?

Niseho tamin'ireo mpianany i Kristy taorian'ny nitsanganany tamin'ny maty, rehefa nihidy tao amin'ny efitrano iray izy ireo noho ny tahotra. Tsy niaraka tamin'izy ireo i Tômasy. Taorian'izay dia ren'i Tômasy avy tamin'ireo mpianatra hafa ny tatitra momba ny fitsanganan'i Jesôsy tamin'ny maty, saingy very fanantenana izy. Tsy nifanaraka tamin'ny sary tao an-tsainy mikasika ny fanjakan Andriamanitra izany. Azo antoka koa fa nanontany tena izy ny amin'ny antony hisehoan'i Jesôsy amin'ireo namany kanefa izy aza tsy teo.

Hoy i Tomasy: "Raha tsy hitako eo amin'ny tànany ny holatry ny nohomboana, ka ataoko eo amin'ny holatry ny nohomboana ny rantsan-tánako, ary ataoko eo amin'ny lanivoany koa ny tánako, dia tsy mba hino aho." - Jao. 20:25.

Nambarany ho ren'ny hafa ireo fepetra mba hinoany ny toe-javatra. Miverimberina ao amin'ny filazantsaran'i Jaona izany fomba fijery ny finoana an'i Jesôsy izany. Izao no navalin'i Nikodemôsy an'i Jesôsy: "Hataon'ny olona ahoana no hateraka rehefa lehibe?" - Jao. 3:4. Izao ny fanontaniana napetrak'ilay vehivavy teo am-pantsakana: "Tompoko, tsy manana fanovozana Hianao, sady lalina ny fantsakana; koa avy aiza no ahazoanao izany rano velona izany?" Jao. 4:11. Ary izao no fanontanian'ireo vahoaka izay nofahanana tamin'ny mofo sy hazandrano: "Inona ary no famantarana ataonao?" - Jao. 6:30.

Izany, hevitra momba ny hoe "mahita vao mino" izany no tsipihin'ny filazantsaran'i Jaona. Rehefa nihaona tamin'i Tômasy i Jesôsy taorian'ny nitsanganany tamin'ny maty, dia nasainy nanatona Azy izy, mba hahita sy hikasika ny tenany. Rehefa izay dia nilaza Izy hoe: "sambatra kosa izay tsy nahita, nefa nino." - Jao. 20:29.

"Andriamanitra tsy mampino antsika na oviana na oviana, raha tsy manome porofo ampy hiorenan'ny finoantsika. Ny fisiany, ny toetrany ary ny hamarinan'ny Teniny dia hamarinin'ny porofo izay mitory amin'ny saintsika, sady ampy hanaranam-po izany porofo izany. Andriamanitra anefa tsy nanaisotra na oviana na oviana izay rehetra mety hahatonga fisalasalana. Tsy maintsy miankina amin'ny porofo mibaribary ny finoantsika, fa tsy amin'ny fitsikeran-javatra." - DHK, t. 120.

Efa nomena porofo marobe isika mba hinoantsika an'i Jesõsy, amin'ny alalan'ny Tenin'Andriamanitra sy ny Famoronana ary ny fanandramantsika manokana.

Inona no holazainao raha misy olona manontany anao hoe: Nahoana ianao no mino an'i Jesôsy?

свернуть