Ауыз судың тапшылығы селден зардап шеккен Қарағайлы елді мекеніндегі өзекті мәселе болып тұр. Күн сайын мұнда жүздеген текше метр ауыз су тасып әкелінеді. «Дегенмен оның өзі жетіспей жатыр»,– дейді тұрғындар.
Табиғи апаттан зардап шеккен Қарағайлы елді мекенінде қайта қалпына келтіру жұмыстары жалғасуда. Наурызбай ауданы әкімшілігінің ақпараты бойынша, бұл аймақтардан бүгінге дейін 145 текше метр балшық, апатты жағдайдағы талдар мен тастар шығарылған. Қарғалы өзенінің жағалаулары да қайта бекітілуде. Көптеген үйлерде жарық бар. Ауланы тазалауға әкімшілік және еріктілер тарапынан көмек болғанымен, кезегін күтпегендер өздерінше әрекет етуде.
Вера Асылбаева, ауыл тұрғыны
-Көмектесетін ешкім болмады. Бәрін өзіміз істедік. Подвалдың астын, откачканы шақырып, оны өзіміз істедік. Балшығын өзіміз шығардық. Мына үйдің арғы жағы әлі шыққан жоқ.
Осы дүрбелеңді пайдаланып, жеке кәсіпкерлер болса қалтасының қамын ойлап, бағаны көтеріп жіберген.
Бикен Рахметова, ауыл тұрғыны
-Үш септиктен он мыңнан отыз мың. Ананың ішін бәрін тазалауына ақша беріп жатырмын.
Ал ең өзекті мәселе ауыз судың тапшылығы болып тұр.
Нұрдәулет Молдабеков, ауыл тұрғыны
-Мен, міне, сағат сегізден жүрмін. Адам көп. Енді келсем су бітіп қалыпты. Су тез-тез бітеді. Менің үйім ана жақта. Су жоқ міне, көп адам су алады.
Ермек Айқынбаев, зейнеткер
-Су жоқ. Газды, светті берді. Енді оған құдайға тәубә. Ал енді мына сулары білмеймін енді. Суды беретін осы машиналары келеді. Соған мәз боламыз.
«Холдинг Алматы су» мекемесі селден зақым келген алғашқы су тазалау және су жинағыш бекеттері мен сүзгі стансалары қайта қалпына келгенін, оның іске жарамды екенін айтады.
Ақбота Жылысова, «Холдинг Алматы су» МКК қоғаммен байланыс маманы
-Су құбырлары ақырындап жол бойы тазаланып келе жатыр. Біз су беруге дайынбыз. Дегенмен, өзен суы әлі де лайланып тұр. Оның лайы азаймағанша, нормаға сәйкес болмағанша, біз ол суды ешқандай бере алмаймыз. Себебі біз судың сапалы болуына және де оның нормаға сәйкес болуына жауап береміз. Сол себепті ол қалпына келгенде міндетті түрде біз суды береміз.
Бұл мекеме өкілдері: «ауа-райы жауын-шашынсыз болса, ауыз судың да келер күні алыс емес», – деп сендірді .
Алуа Маханбет, Гүлнәр Омарбекова, Хасен Ыбышев, Геннадий Лукин
