Бүгін БҚО-ның әкімдігінде қаладағы барлық коммуналдық кәсіпорын басшылары мен бұқаралық ақпарат құралдарының өкілдерінің қатысуымен брифинг болып өтті. Онда өңірдің көктемгі су тасқынына төтеп беру мәселесі талқыланып, коммуналдықтардың қаншалықты дайын екендігі анықталды.
Брифингке қаладағы барлық коммуналдық кәсіпорын басшылары мен қала әкімінің орынбасары Ғалым Орынғалиев қатысты. Орал су арнасына тілшілерден су сапасына еріген қар суының әсері бар ма деген, ал шаһар басшылығына қаладан шығарылған қардың табиғатқа тиетін зияны жөнінде көптеген сұрақтар қойылды. Себебі жанармай мен май қалдықтары тамған лас қар өзен суларын зиянын тигіземе деген қауіп бар болатын.
Биыл Ресейден келетін судың көлемінің көп болуы барлық саяжай қоғамдастықтарын су астында қалдыруы ықтимал. Бүгінгі таңда саяжайларда 7500 адам қысы-жазы мекен етеді. Бүгін олардың көктемгі мезгілде саяжайда болуының қауіпті екендігі айтылып, кез-келген жағдайға дайын болуы керектігі түсіндірілді.
Қалада температурының жоғары болуы қар суын ерітіп үлгерген. Сондықтан көп салалы жол пайдалану кәсіпорыны бүгінде қар шығарумен қатар, көше бойына жиналған суды сорғызумен де айналысуда.
Коммуналдық кәсіпорындар көктемгі су тасқыны бола қалған жағдайда бір жағадан бас , бір жеңнен қол шығара табиғи апатқа тойтарыс беріп, жұмыстану жөнінде айтып тарқасты.
