Əmək və Əhalinin Sosial Müdafiəsi Nazirliyi son günlər xüsusən sosial şəbəkələrdə müharibə əlillərinin və şəhid ailələrinin sosial təminatı məsələləri ilə bağlı yayılan bəzi yanlış məlumatlara aydınlıq gətirib.
Nazirliyin mətbuat xidmətinin rəhbəri Fazil Talıbovun APA TV-yə açıqlamasında bildirib ki, bəzi sosial şəbəkə istifadəçilərinin şəhid ailələri və müharibə əlillərinin yalnız təqaüdlə təmin edildiyi barədə fikirləri məlumatsızlıqdan irəli gəlir.
Şəhid ailələri və müharibə əlilləri pensiya, müavinət və digər sosial proqramlarla da əhatə olunurlar: “Bəzi sosial şəbəkə istifadəçiləri məlumatsızlıqdan dolayı bu təminat növlərinin yalnız bir və ya ikisini qeyd edirlər. Amma demək lazımdır ki, müharibə əlilləri və şəhid ailələri çoxsaylı proqramlarla təmin olunub. Bunlardan birincisi şəhid ailələrinə və müharibə əlillərinə sığorta ödənişinin edilməsidir. Şəhid ailələrinə və şəhid vərəsələrinə 11 min manat dəyərində sığorta ödənişi verilir. 1-ci qrup müharibə əlillərinə 8800, 2-ci qrup əlillərə 6600 manat, 3-cü qrup əlilliyi olan şəxslərə isə 4400 manat sığorta ödənilir. Bununla yanaşı, əmək stajına uyğun olaraq onlara pensiya verilir. Eyni zamanda pensiya alan müharibə əlillərinin sığorta hissəsinə ödənişlər əlavə olunur. Həmçinin şəhid ailələri və müharibə əlilləri üçün Prezidentin aylıq təqaüdü mövcuddur. Hər ay bu təqaüdlər, şəhid ailələri və müharibə əlillərinə ödənilməkdədir”.
Fazil Talıbovun sözlərinə görə, şəhid ailələri və ya müharibə əlillərinin ailələrində ödənişli təhsil alan tələbələrin təhsil haqları da dövlət büdcəsi hesabına qarşılanır. Müharibə əlillərinin protezlərlə təmin olunması, həmçinin onların sağlamlıqları ilə əlaqədar olaraq dincələ bilmələri üçün sanatoriyalara göndərilməsi təmin olunur. Məşğulluq proqramlarının icrası zamanı ilk olaraq məhz bu qəbildən olan vətəndaşların müraciətləri nəzərə alınır. Bundan əlavə, şəhid ailələrinin və müharibə veteranlarının mənzil və avtomobil təminatı məsələsi də hər zaman diqqət mərkəzindədir: “Şəhid ailələri və müharibə əlilləri mənzil şəraitinin yaxşılaşdırılması ilə bağlı ehtiyac yarandıqda, yerli orqanlara müraciət edirlər və bu zaman növbəlilik yaranır. Bundan sonra Nazirlik növbəli olaraq onları mənzillə təmin edir. Bu mənzillər tam təmirli və mətbəx mebeli ilə təmin olunmuş qaydada onlara təhvil verilir. İndiyə qədər 9 min mənzil və 7 min avtomobil onlara təqdim edilib”.
Fazil Talıbovun sözlərinə görə, birdəfəlik ödəmələr də nəzərə alınmaqla şəhid ailələri və müharibə veteranlarına aylıq 700 manata qədər sosial ödənişlər edilir. Gələcəkdə bu ödənişlərin daha da yaxşılaşdırılması istiqamətində işlər görüləcək. Bundan başqa, şəhid ailəsi üzvləri və müharibə əlilləri üçün vergi, əmək və digər qanunvericiliklərdə bir sıra güzəştlər də nəzərdə tutulub.
Rəsmi facebook səhifəmiz: [ Ссылка ]
Rəsmi instagram səhifəmiz: [ Ссылка ]
Rəsmi twitter səhifəmiz: [ Ссылка ]
#apatv #apaxeber
