Bakıda “İran–Proje-2016” ikinci ixtisaslaşmış neft-qaz, əczaçılıq, inşaat, texnika və avtomobil sahəsi sərgisi açılıb. Sərgidə İranın 50–dən çox şirkəti öz məhsullarını nümayiş etdirir.
“İran Proje-2016” sərgisi ölkələr arasında iqtisadi əlaqələrin genişlənməsi, ticarət və investisiya əməkdaşlığının inkişafı baxımından böyük əhəmiyyət kəsb edir. İqtisadiyyat nazirinin müavini Sahil Babayev belə deyib. Bildirib ki, bu ilin 7 ayı ərzində İranla Azərbaycan arasında ticarət dövriyyəsi 70% artıb. Azərbaycandan İrana ixracın həcmi ikiqat artdığı halda, qonşu ölkədən Azərbaycana idxalın həcmi 58% artıb. İranın ticarət, sənaye və mədən nazirinin müavini Cəfər Sərqini qeyd edib ki, sərginin əsas məqsədi iki ölkənin sahibkarları arasında birbaşa əlaqə yaratmaq, azərbaycanlı və iranlı iş adamlarının əməkdaşlığının daha da güclənməsinə nail olmaqdır.
“Bu cür sərgilərin keçirilməsi iki ölkə arasındakı ticarət əlaqələrinin inkişafına böyük töhfə verəcək. Bu günkü sərgi həm təşkilati, həm də iştirakçı sayı baxımından daha mötəbərdir. Əminik ki, belə sərgilərin keçirilməsi iki ölkə arasında əlaqələrin inkişafına təkan verəcək. Ümid edirik ki, bu sərgi İran şirkətlərinin Azərbaycan bazarında özlərinə yer tapmasına kömək edəcək”.
Sərgidə neft-qaz, neft-kimya, tikinti-inşaat, energetika, su təchizatı avadanlıqları, texniki və mühəndislik xidmətləri üzrə fəaliyyət göstərən İranın şirkətləri iştirak edirlər. Burada İranın turizm, kənd təsərrüfatı, bank və sığorta sahəsi ilə də tanış olmaq mümkündür.
“Xodro” Avtomobil Şirkətinin təmsilçisi Sabina Nobari: “Biz “Azeurocar” ilə birgə bu 4 yeni maşının istehsalına başlamışıq Neftçalada. 2017-ci ikinci yarısında Tolidol istehsal olunmağa başlayacaq”.
Şirkət rəhbəri Əmir Bərkəb Mömini: “İlk dəfədir Azərbaycandakı sərgidə iştirak edirəm. İstərdim ki, Azərbaycana da mallarımızı ixrac edək. Mən Azərbaycanda müştərək iş görmək üçün yerli sahibkarla əməkdaşlıq edib burada sərmayə qoymağa da hazıram”.
Şirkət təmsilçisi Adil Çayçiyan: “Azərbaycanın neft və qaz sənayesində iştirak etmək istərdik. İlk dəfədir Azərbaycan Respublikasındayıq. Azərbaycan holdinqləri ilə əməkdaşlıq etməkdə maraqlıyıq. Hətta müştərək şirkət yarada da bilərik”.
“İran Proje-2016” ikinci ixtisaslaşmış neft-qaz, əczaçılıq, inşaat, texnika və avtomobil sahəsi üzrə sərgisi sentyabrın 21-dək davam edəcək. Sərgi çərçivəsində sentyabrın 20-də Azərbaycan-İran biznes-forumunun keçirilməsi də planlaşdırılır.
