Şeir: Tofiq Bayram - Qadın ürəyi
Səsləndirmə: Samir Bağıroğlu

Biraddımla'ya YouTubeda abunə olmaq: [ Ссылка ]

Biraddımla'nın sosial şəbəkə ünvanları:
Instagram: [ Ссылка ]
Facebook: [ Ссылка ]
TikTok: [ Ссылка ]
Telegram: [ Ссылка ]
E-poçt: biraddimlayol@gmail.com

TOFİQ BAYRAM - QADIN ÜRƏYİ

Necə rəhmlidir, necə amansız,
Necə mehribandır qadın ürəyi!
Sən onu sındırsan, bil ki, a qansız,
Ağlayan kamandır qadın ürəyi.

...Güldürsən, ömürlük səadətindir,
Söndürsən, yanmağı bir də çətindir.
O, əsl qayğının, məhəbbətindir,
Sevgisiz zindandır qadın ürəyi.

Daşı da əridər, daş da olar o,
Əriyib gözlərdə yaş da olar o.
Bahar da olar o, qış da olar o,
Damladır, ümmandır qadın ürəyi.

Onunla dünyadır sənə qəfəs də,
Onsuz heç yaşama bu torpaq üstə.
Sevən bir ürəyə axır nəfəsdə
Ən gözəl dərmandır qadın ürəyi.

Onu alçaldan da, ucaldan da biz,
Dərd verib, vədəsiz qocaldan da biz.
Qədrini biləndə bu cahanda biz,
Həmişə cavandır qadın ürəyi.

Bəzən gültək solar acı bir sözdən,
Ağlayar xəlvəti, gülsə də üzdən,
Bəzən uşaq kimi bir ürəksizdən
Məhəbbət umandır qadın ürəyi.

Bir namərd əlindən zəhər içəndə,
Keçirər ömrünü o, yas içində.
Bəzən ən qiymətli libas içində,
Nalədir, fəğandır qadın ürəyi.

Sənsiz əl çəkərəm arzudan, kamdan,
Nə çıxar sevgisiz – sənsiz ilhamdan?
İncitsən, dözərəm, Tofiq Bayramdan
İncimə, amandır, qadın ürəyi!

Tofiq Bayram’ın bacısı Svetlana Bayramova:
“Tofiq çox erkən, 21 yaşda bir sinifdə oxuduğu Zərifə xanımla ailə qurub. Həyat yoldaşı Zərifə xanımı çox sevib, silsilə məhəbbət şeirlərini ona həsr edib. Buna baxmayaraq Tofiqin gizli bir sevdası vardı. Bu, Türkiyənin vaxtilə çox məşhur bir opera müğənnisi olan Sevda Aydan idi. 1964-cü ildə Sevda Aydan Bakıya, Opera və Balet Teatrına qastrola gəlir. O ərəfədə də Tofiq həmin teatrda ədəbi-hissə müdiri idi. Onların arasında münasibətlər yaranır. Mənə elə gəlir ki, Tofiq o qadına vurulmuşdu. Və Sevda Aydan da ona qarşı biganə deyildi. Həmin ərəfədə Tofiq Sevdaya bir şeir yazdı. Sevda həmin şeiri Türkiyəyə apardı. O şeir qısa bir müddətdə sevildi, dillər əzbəri oldu. Və bu şeiri həmin dövrdə də, indi də Türkiyədə əzbər bilməyən adamlar çox az olar.
Sevdanı sevəndə Tofiqin 30 yaşı olub. Xanımı da bu sevgidən xəbərdar olub və məsələni sakit qarşılayıb. Deyib ki, mən fəxr edirəm ki, qadınlar mənim yoldaşımı sevir. Ancaq Tofiqin gizli sevdası Sevda da yox, tamam başqa bir qadın olub. Təxminən on il qabaq bir hüzür yerində bir yaşlı xanım yaxınlaşdı mənə. Yaşına baxmayaraq, son dərəcə gözəl idi. Hətta, o yaşında belə ona vurula bilərdilər. Dedi, məndə bir əmanət var, onu sizə çatdırmalıyam. Dedi, o əmanəti uzun illər saxlayıb və gəlin köçəndə yoldaşı xəbər tutmasın deyə anasına verib. Soruşdum, nə idi əmanət? Dedi, Tofiq Bayramın ona həsr etdiyi şeir. Məni evinə dəvət elədi, getdim. Çox gözəl süfrə açmışdı. Xeyli söhbət elədik və həmin əmanəti, ona həsr olunmuş şeiri mənə verdi. Şeir “Ay gecikən məhəbbətim” şeiri idi. Həmin şeirin ilkin variantı, əlyazması idi. 2015-ci ildə Tofiq Bayramın şeirlər kitabını dərc edəndə “Ay gecikən məhəbbətim” şeirini iki variantda verdim.
Amma o xanım məndən küsdü. Dedi, bizim aramızda olan sirr idi bu.
Ay gecikən məhəbbətim” şeirinin birinci variantında şairin qeydi də yer alıb:
Sadəliyində ülvi gözəllik, gözəlliyində ucalığı ölçüyə gəlməyən məna duyduğum, gələcəkdə yazacağım ən gözəl nəğmədən daha incə, daha zərif şeiriyyət olan Tamilla xanıma ithaf edirəm!”
#tofiqbayram #qadınürəyi #samirbağıroğlu #şeir #şair #ədəbiyyat #ədib #poeziya #svetlanabayramova #sevdaaydan #biraddimla #biraddimlayol

свернуть