«Қазақстанда инсульт ауруы жасарып барады», – дейді медиктер. Бұл ауруға жылына 50 мыңдай адам шалдығып, тең жартысы мүгедек болып қалады екен.
Қарағандыда мемлекеттік-жеке серіктестік аясында ашылған нейрооңалту орталығы осындай науқастарды қабылдай бастады. Орталық – республикалық деңгейде жүйке ауруларын емдейтін бірегей орын. Мұнда инсульт, бас сүйек ми зақымы мен омыртқаға операция жиі жасалады. Орындар үш есе артып, қосымша 68 адам қабылдай алады.
Биыл облыста 2000 адам инсульт алып, нейрооңалту орталығы 300-дейін аяғынан тұрғызған. Заманауи медқұралдармен жабдықталған орталық денешынықтыру, мануалды емдеу, физиотерапия, интерфлексті терапия, тоқпен емдеу, массаж сынды ем түрлерін ұсынады.
Бақыт Жақсыбекова, Балқаш қаласының тұрғыны:
-Инсульт болып, содан түстім осы жерге, аяқ-қол жұмыс істей бастады. Бақайларымда мүлдем жан жоқ болатын, екі үш күн болды жан пайда болды, соған қуанып жатырмын. Барлық емдер уақытында, дәрігерлер жақсы қарайды, ауырғаныңды ұмытып қаласың.
