Құлдыраудан көз ашпай келген қара алтын бағасы бүгін аздап қымбаттады. Brent маркалы мұнайдың баррелі шамамен 1 пайызға өсіп, 36 доллар 56 центке жетті.
Мұнайдың WTI маркасында да аздаған өсім тіркелді.
Қазақстандық сарапшы Ақбар Тұқаев : «Келер жылдың ортасына қарай мұнай бағасы өсуі ықтимал», – дейді.
Айтуынша, бағаның көтерілуіне үш негізгі фактор әсер етеді.
Олар:
-доллар индексінің әлсіреуі
-қара алтынның жасанды бағасының құлдырауы
-сұраныс пен ұсыныстың теңесуі.
Қазіргі таңда Үндістан секілді дамып келе жатқан ірі мемлекеттерде мұнай тапшылығы сезіледі. «Яғни сұраныс бар жерде баға да өседі деген сөз», – дейді сарапшы.
Ақбар Тұқаев, сарапшы
-Үндістанның дамуы ескерілмей келеді. Бірақ ол мұнай тұтыну бойынша әлемдегі төртінші мемлекет. Алдында Жапония орналасқан. Келер жылы Үндістан күншығыс елінен озады деп күтілуде. Мұнай нарығындағы сұраныстың артуы бағаны өсіріп, ретке келтіруге мүмкіндік ашады. Барлық дүние сол сұраныстың көбеюіне байланысты болып отыр. Осылайша келер жылдың ортасына қарай қара алтын бағасы қазіргі 30 доллардан 50-ге дейін көтерілуі тиіс.
