Бүгін Астанада Президент Нұрсұлтан Назарбаевтың қатысуымен Ұжымдық қауіпсіздік туралы шарт ұйымы ұжымдық қауіпсіздік кеңесінің сессиясы өтті. Маңызды жиынға Қазақстаннан бөлек, Ресей, Қырғызстан, Беларусь пен Тәжікстан президенттері және Армения елінің премьер-министрі міндетін атқарушы Никол Пашинян қатысты. Алдымен шағын, одан кейін кеңейтілген құрамда кездескен тараптар ұйымның әскери әлеуетін нығайту, заңсыз көші-қонды реттеу мәселесін талқылап, 2025 жылға дейінгі жұмыс жоспарын түзді. Сондай-ақ, мемлекет басшылары халықаралық және аймақтық қауіпсіздік жайы мен өзара ықпалдастықты тереңдету мәселесін де ұмыт қалдырмады. Жиын қорытындысы бойынша Ұжымдық қауіпсіздік туралы шарт ұйымы Ұжымдық қауіпсіздік кеңесінің декларациясы қабылданды. Осымен Қазақстанның халықаралық ұйымға төрағалығы аяқталып, бұл маңызды міндет Қырғыз еліне жүктелетін болды. Қырғызстан президенті Сооранбай Жиенбеков төраға ел ретінде келер жылы атқарылатын шаралардың іс-жоспарымен таныстырды. Жиын соңында Президент Нұрсұлтан Назарбаев пен Ұжымдық қауіпсіздік шарты ұйымы бас хатшысының міндетін атқарушы Валерий Семериков журналистердің сұрақтарына жауап берді.
