Bıçaqlarını silib təmizləyir, itiləyir ki, işə qoyulsun. Tam 18 saat piştaxtanın arxasında itilədiyi bıçaqları ilə köz olmuş toyuğu doğrayıb müştərilərinə dönər hazırlayır. Atamoğlan Səmədov 15 ilin dönərçisidir. Deyir hansı dövlətdə adam 18 saat işləyər?
“Mənim şəxsən indi nə yaşım var ki, indidən ayaqlarım ağrısın? Nədir-nədir iki saat da artıq dayanıram ki, 3-4 manat əlavə gəlirim olsun”.
Ard-arda gələn iki devalvasiya dönərçinin də işini çətinə salıb. Qiymətlər qalxıb, müştəriləri azalıb. Əvvəlki qədər qazana bilmirlər.
“Gündəlik 56 manat icarənin pulu ayrılır. Özümə də 20-25, bayramqabağı iş yaxşı olanda 30 manat qalır. O qalan pulla da sabahkı malları almaq lazım gəlir. Ayran, kola gətirməlisən, xiyarın kiloqramı da 6 manata qalxıb”.
Atamoğlan Səmədov deyir ki, gənclərin arasında işsizlik artıb. Adamlarda pul yoxdur. Müştərilər dönəri bölüb alanda, o, bunu daha yaxşı hiss edir.
“Müştəri var ki, ötən il gəlib 3 dönər alırdı. İkisini övladına, birini özünə. İndi həmin müştəri gəlib bir dönər alır, onu 3 yerə böldürür. Deməli, keçən ildən, inişildən çox geriyə düşmüşük”.
Hər gün səhərin 8-dən axşam 10-na kimi müştərilərini məmnun etməyə çalışan dönərçi ailəsi ilə vaxt keçirməyə də macal tapmır. Saatlardır dayanmadan ayaqüstə çalışdığından damar genişlənməsi yaranıb. 6 il övlad sahibi ola bilməyib. İndi üzləri güclə gülür.
“Evdən çıxanda da uşaqlar yatmış olur, evə gələndə də. Arada istirahət günü götürüb, üzlərini görə bilirəm. Əsas odur bilirlər ki, ataları mənəm”.
Kanala abunə ol - [ Ссылка ]
WebSite: [ Ссылка ]
Facebook: [ Ссылка ]
Twitter: [ Ссылка ]
Google+ [ Ссылка ]
İnstagram: [ Ссылка ]
__
Xəbərdən çox xəbər var. #çəkgöndər yayımlayaq #whatsapp : +49 176 16263646
