Երեկ՝ օգոստոսի 31-ին, լարված իրավիճակ էր ստեղծվել Երևանում։ Վաղ առավոտվանից ոստիկանության Շենգավիթի բաժնի ծառայողները ժամանել էին Սևանի փողոց 30/1 հասցե, որտեղ հսկողություն էին իրականացնում, որպեսզի ինչ-որ խանութի սեփականատեր քանդել տա բնակիչների կողմից կառուցված անվտանգության պատը։ Այդ մասին ֆոտոլրագրող Գագիկ Շամշյանի հետ զրույցում ասում էին բնակիչները։ Նրանք ասում էին նաև. «Էն, որ ասում են՝ ախորժակն ուտելիս է բացվում, լրիվ ոմն Կարեն Համբարձումյանի մասին է։ Սկզբից էկավ, շենք սկսեց կառուցել, մտածեցինք, որ բարի գործ է անում, բայց հետո հասկացանք, որ բոլորիս մատների վրա խաղացրել է։ Կառուցելիս սարեր էր խոստանում, թե այս հատվածր բարեկարգելու եմ, ասֆալտապատելու, որ այդ հատվածը, որ մենք պարսպի ենք վերածել, հիմա նա ոստիկանների հսկողությամբ ավերում է։ Դեռ սովեական տարիներից այս հատվածը բնակիչներիս համար եղել է ընդհանուր օգտագործման տարածք։ Հիմա Կ. Համբարձումյանը իր տարածքը փակել, արենդայով է տվել և մեր ընդհանուր տարածքը փորձում է վերածել «պռախադնոյ դվորի»։ Պատկերացնո՞ւմ եք՝ ինչ է կատարվելու. իրենց մեքենաները, այդ թվում՝ բեռնատարները, կայանելու են, իրենց գնալ-գալով մի իսկական պատուհաս են դառնալու 150-ից ավելի ապրող մարդկանց համար, այդ թվում՝ երեխաների։ 10-ից ավելի սեփական տներ կան։ Էդ մի թիքա տեղն է, որ որպես խաղահրապարակ ենք օգտագործում։ Էն էլ մարդը քնել-հելել, որոշել ա, որ իր ելք ու մուտքը կարող է փակել ու սարքել խանութ ու արենդայով տալ, իսկ մեր երեխաների համար որպես խաղալու տեղ օգտագործվող տարածքը խլում է։ Նրա ներկայացուցիչը մեզ ասում է, թե իրենց գործողություններն օրինական են, մինչդեռ, ըստ օրենքի, նշված տարածքն իրենով անելուց առաջ պետք է թաղամասի բնակիչների համաձայնությունը լիներ։ Իսկ մենք վստահ ենք՝ առանց դրա է ամեն ինչ արել։ Հիմա էլ ոստիկաններին բերել, լցրել է էստեղ ու ասում է, թե օրենքով եմ ամեն ինչ անում. ինչ ուզենամ, կանեմ։ Ասում էին՝ հեղափոխությունից հետո նման զոռբայություններ չեն լինելու, արմատախիլ են անելու նման բարքերը։ Սա՞ է ձեր՝ ժողովրդի կողքին կանգնելու միսիան։ Պահանջում ենք, որպեզի ժամանակավորապես Կ. Համբարձումյանը դադարեցնի տարածքի զավթումը, ու մեր փաստաբանն արդեն դիմել է դատարան, որպեսզի հարցը դատական կարգով լուծվի; Մենք վստահ ենք, որ նրա գործողություններն ապօրինի են»։
Մանրամասները` [ Ссылка ]
