Енді талай жыл баспана кезегінде тұрған мүмкіндігі шектеулі жасөспірімдердің үй кезегі 18 жасқа толғанда да сақталады. Ал 7 және 16 жас аралығындағы мүгедектігі бар балаларды денсаулығына байланысты мүгедектік топқа бөледі. Сондай-ақ, мүмкіндігі шектеулі жандарға да, олардың күтушілеріне де берілетін жәрдемақы көбейеді. Көпшіліктің, әсіресе мүмкіндігі шектеулі жандардың қуанышты жаңалығын бүгін заң жобасын дайындап келген Еңбек және халықтың әлеуметтік қорғау министрі Серік Шәпкенов жеткізді.
Елімізде 1 топтағы мүмкіндігі шектеулі 66 мың азамат болса, оның әрбір үшіншісінің көмекшісі де, күтімі бойынша алатын жәрдемақысы да жоқ. Яғни, ауыр дертке шалдыққан, өздігінен жүріп-тұра алмайтын 22 мың адам күтушіге зәру. Министр Серік Шәпкенов енді ол азаматтарға қосымша жәрдемақы береміз деді. Ал, мүгедектігі бар барлық топтағы балалардың жәрдемақысын 16,7 пайыздан 37 пайызға көбейтеді. Министр енді мүгедектігі бар бала 18 жасқа толса да баспана кезегі сақталатынын да айтты.
СЕРІК ШӘПКЕНОВ, ҚР Еңбек және халықты әлеуметтік қорғау министрі:
– Бұндай отбасылар үй алуға 10 жылға дейін кезекте тұра береді. Егер олар 18 жасқа дейін үй алмаса онда олар мүгедектігі бар адам ретінде қайтадан кезекке тұруы керек. Бұл норма 20 мыңнан астам отбасының кезектілігін сақтауға мүмкіндік береді 1628
Министрдің бұл жаңалығына мүмкіндігі шектеулі ұлын бағып отырған Меруерт Күшенова қуанғанымен, жәрдемақыны кемі 300 мың теңгеге жеткізбесе мәселеміз шешілмейді дейді. Өйткені, мемлекеттік квотамен мүгедек баланы ем-домына апаруы үшін талай жылдап кезек күтеді. Ал, қазіргі ұлының мүгедектігі мен өзінің күтуші ретінде алатын 97 мың теңге жәрдемақысы баланы жекеменшік орталықтарда дамытуға жетпейді дейді. 9 жасар Нұрым секілді аутизмге шалдыққан балалардың өз әлемі бар: өзге балалармен ойнамайды, артық сөйлемейді. Қарым-қабылетін арттыру үшін анасы түрлі жекеменшік орталықтарға апарған. Қазір Нұрым нота таниды, синтезаторда ойнайды.
МЕРУЕРТ КҮШЕНОВА, Нұр-Сұлтан қаласының тұрғыны:
– Аналар бар который 200-300 мыңға дейін только тамағы мен витаминіне ай сайын жұмсайтын. Көбіміз үйге зәруміз. Бұндай балалармен мысалы квартираға алмайды. Жиған-тергеннің бәрі осы балалардың еміне кетеді. Өзімде сондай жағдай болды даже үйімізді сатуға да тура келді.
Қазіргі заң бойынша мүгедек баланы күту кезеңі 16 жасқа дейін. Яғни, бала 16 жастан асқанда күтушіге берілетін жәрдемақы да тоқтайды. Енді бұл норма 18 жасқа дейін ұзарды. Жаңа норма бойынша ата-анасынан айырылған жағдайда бала мүгедектігі үшін де, асыраушысынан айырылғаны үшін де жәрдемақы алатын болады. Министр Серік Шәпкенов қазіргі қолданыстағы "мүгедек" ұғымы енді "мүгедектігі бар адам" деп өзгергенін де айтты. Ел асыға күткен, бүгін Мәжіліс депутаттары мақұлдаған бұл заңды енді сенаторлар қарайды.
Айбар Төлжанұлы, Дидар Елеуов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#мүгедек_жандар #жәрдемақы_жыры
